बुट्ट्या गायकवाडचे मारेकरी कोण? 11 वर्षानंतर पुन्हा का होतीये चर्चा?

बीडमधील बुट्ट्या गायकवाड खून प्रकरणाची 11 वर्षानंतर पुन्हा चर्चा सुरु झाली आहे. संतोष देशमुख हत्या प्रकरणापेक्षाही बुट्ट्या गायकवाड हत्या प्रकरण गंभीर असल्याचा आरोप गुणरत्न सदावर्ते यांनी केला आहे. गायकवाड यांच्या हत्येत भाजप आमदार सुरेश यांचा हात होता का?  याचा तपास करणं गरजेचं असल्याचं सदावर्ते यांनी म्हंटलं आहे. सदावर्तेंनी काय आरोप केले आहेत, आणि बीड प्रकरणाचा पाठपुरावा करणाऱ्या धस यांनी काय उत्तर दिलं आहे ते जाणून घ्या.

बुट्ट्या गायकवाडच्या हत्येचा मास्टरमाईंड कोण?

बुट्ट्याच्या हत्येची फाईल ओपन करण्याची मागणी

आष्टीतील हत्येची 11 वर्षानंतर पुन्हा चर्चा

बुट्ट्या गायकवाडची 11 वर्षापूर्वी म्हणजेच 2014 साली हत्या झाली होती. या हत्येचा मास्टरमाईंड कोण असा सवाल गुणरत्न सदावर्तेंनी उपस्थित केला आहे. संतोष देशमुखांच्या हत्येनंतर महादेव मुंडे, बापू आंधळेच्या हत्या कुणी केल्या असा सवाल भाजप नेते सुरेश धस यांनी उपस्थित केला होता. 

सुरेश धसांनी परळीतल्या अनेक खुनांबाबत प्रश्न विचारला. एवढंच नव्हे तर पोलीस कॉन्स्टेबल भास्कर केंद्रेवरही आरोप केले. भास्कर केंद्रे हे मटका व्यावसायिकाचे भागीदार असल्याचा आरोप केला. शिवाय त्यांचे 100 टिप्पर असल्याचाही आरोप सुरेश धसांनी केला.

स्वतः भास्कर केंद्रेंनी हे आरोप फेटाळले. भास्कर केंद्रेंची एक कथित ऑडिओ क्लिप व्हायरल झाली. त्या ऑडिओ क्लिपमध्ये भास्कर केंद्रे असं नाव सांगणाऱ्यानं बुट्टेच्या हत्येमागं सुरेश धस असल्याचा आरोप केला. त्यावेळी तपास पथकात आपण होतो त्याच रागातून  सुरेश धसांनी आरोप केल्याचा दावा करण्यात आला.

वकील गुणरत्न सदावर्तेही आता पुढे आलेत. त्यांनी बुट्ट्या गायकवाड हत्येची फाईल रिओपन करण्याची मागणी केली आहे. झी 24 तासच्या टू द पॉईंट या विशेष मुलाखतीतही बुट्ट्या गायकवाडबाबत सुरेश धसांना विचारण्यात आलं. यावर धसांनी आपला काहीही संबंध नसल्याचा दावा केला आहे.

परळीच्या खुनांची चौकशी करण्याची मागणी होत आहे. तर आष्टीतल्या बुट्ट्याच्या खुनाचीही पुन्हा चौकशी कऱण्याची मागणी होत आहे. आष्टीचे आमदार सुरेश धस आहेत. बुट्ट्याच्या निमित्तानं सुरेश धसांचा इतिहास तर तपासून पाहिला जात नाही ना याची चर्चा सुरु झाली आहे.