प्रजासत्ताक दिनी राजपथावर महाराष्ट्राचा सहभाग नसणार, केंद्राच्या निर्णयावर टीका

नवी दिल्ली : प्रजासत्ताक दिनी दिल्लीतील राजपथावर देशातील विविध राज्यांची संस्कृती दर्शविणारे चित्ररथ पाहायला मिळतात. संपूर्ण देशाचे लक्ष या देखाव्यांकडे असते. यावेळेस २६ जानेवारीला महाराष्ट्र कडून छत्रपती शिवाजी महाराजांचे आरमार हा देखावा सादर करण्यात येणार होता. त्या संदर्भाची तयारी ऑगस्ट महिन्यापासून केली होती. परंतु डिसेंबर महिन्यात महाराष्ट्राला सहभाग घेता येणार नाही, असे केंद्र सरकारकडून सांगितले. त्यामुळे राज्यातील जनतेकडून यावर नाराजी व्यक्त करण्यात येत आहे. अनेक राजकीय नेत्यांनी यात उडी घेतली असून याचा निषेध नोंदवला आहे. 

महाराष्ट्राचा चित्ररथ राजपथावरील संचलनात नेहमीच देशाचे आकर्षण ठरत आला.अनेकदा पहिल्या क्रमांकाचा पुरस्कार मिळाला. महाराष्ट्राला डावलून केंद्र सरकारला कोणता घोडा पुढे सरकवायचा आहे. हे काँग्रेस राजवटीत घडले असते तर महाराष्ट्र भाजपाने बोंबाबोंब केली असती. आज गप्प का?

— Sanjay Raut (@rautsanjay61) January 2, 2020

महाराष्ट्र आणि प.बंगालचे चित्ररथ यावेळी प्रजासत्ताक दिनी दिसु नयेत या मागे राजकिय षडयंत्र आहे काय?
आम्ही प्रखर राष्ट्रभक्त आहोत हा आमचा गुन्हा आहे का?

— Sanjay Raut (@rautsanjay61) January 2, 2020

महाराष्ट्रासोबत पश्चिम बंगालचा चित्ररथ देखील प्रजासत्ताक दिनी दिसणार नाही. या सर्वामागे राजकीय षढयंत्र आहे का ? असा प्रश्न शिवसेना नेते संजय राऊत यांनी उपस्थित केला आहे. 

प्रजासत्ताक दिनानिमित्तच्या संचलनात महाराष्ट्र व पश्चिम बंगालच्या चित्ररथास केंद्र सरकारने परवानगी नाकारली.हा देशाचा उत्सव असून केंद्र सरकारने सर्व राज्यांना प्रतिनिधित्व देणे अपेक्षित आहे.परंतु सरकार आकसाने वागत असून विरोधकांची सत्ता असणाऱ्या राज्यांना सापत्नभावाची वागणूक देतेय.

— Supriya Sule (@supriya_sule) January 2, 2020

प्रजासत्ताक दिनानिमित्तच्या संचलनात महाराष्ट्र आणि पश्चिम बंगालच्या चित्ररथास केंद्र सरकारने परवानगी नाकारली. हा देशाचा उत्सव असून केंद्र सरकारने सर्व राज्यांना प्रतिनिधित्व देणे अपेक्षित आहे.परंतु सरकार आकसाने वागत असून विरोधकांची सत्ता असणाऱ्या राज्यांना सापत्नभावाची वागणूक देते असल्याची टीका राष्ट्रवादी नेत्या सुप्रिया सुळे यांनी केली आहे.