काश्मीरमध्ये दहशतवाद्यांचा गोळीबार; RSS च्या नेत्याचा मृत्यू

श्रीनगर:  जम्मू-काश्मीरच्या किश्तवाड जिल्हा रुग्णालयात मंगळवारी दहशतवाद्यांनी केलेल्या गोळीबारात राष्ट्रीय स्वयंसेवक संघाचे नेते चंद्रकांत शर्मा यांचा मृत्यू झाला. किश्तवाड येथे दुपारी १२ वाजण्याच्या सुमारास हा प्रकार घडला. यावेळी रुग्णालयात शिरलेल्या दहशतवाद्यांनी बेछुट गोळीबार केला. यामध्ये चंद्रकांत शर्मा आणि त्यांचा सुरक्षा रक्षक (पीएसओ) जखमी झाले होते. या घटनेनंतर सुरक्षा रक्षकाचा तात्काळ मृत्यू झाला. तर चंद्रकांत शर्मा यांचा काही वेळापूर्वी उपचारादरम्यान मृत्यू झाला. या घटनेनंतर पोलिसांनी संपूर्ण परिसराला वेढा घातला होता. 

J&K: Medical Assistant Chandrakant Sharma working at district hospital in Kishtwar injured in an attack by terrorists, his PSO shot dead. Sharma is also associated with the RSS

— ANI (@ANI) April 9, 2019

दरम्यान, आता या घटनेमुळे काश्मीर खोऱ्यातील तणाव वाढण्याची शक्यता आहे. चंद्रकांत शर्मा यांना मारण्यासाठीच हा हल्ला करण्यात आला होता. बुरखा परिधान करून दहशतवादी रुग्णालयात शिरले. ओपीडीमध्ये येऊन या दहशतवाद्यांनी चंद्रकांत यांच्या दिशेने अंदाधुंद गोळीबार सुरू केला. त्यात चंद्रकांत गंभीर जखमी झाले तर त्यांचा बॉडीगार्ड जागीच ठार झाला. गोळीबारानंतर सुरक्षारक्षकाकडील शस्त्र घेऊन हे दहशतवादी पळून गेल्याचे पोलिसांनी सांगितले. या घटनेनंतर पोलिसांनी संपूर्ण परिसराला घेराव घातला. तसेच खबरदारीचा उपाय म्हणून परिसरातील इंटरनेट सेवा खंडित करण्यात आली आहे. या घटनेनंतर जमावाने रुग्णालयाबाहेर पाकिस्तान विरोधात घोषणाबाजी केल्याचेही समजते. या पार्श्वभूमीवर किश्तवाडमध्ये लष्कराला पाचारण करण्यात आले आहे.