अंधेरीत इमारतीला आग, दोघांचा होरपळून मृत्यू

मुंबई: अंधेरी परिसरातील वीरा देसाई रोडवरील कदम नगर एसआरएच्या २२ मजली इमारतीला मंगळवारी रात्री साडेआठच्या सुमारास भीषण आग लागली. या दुर्घटनेत दोन व्यक्तींचा होरपळून मृत्यू झाला. तर अन्य तिघांना वाचवण्यात यश आले. 

येथील ओबेरॉय टॉवरनजीक असलेल्या एसआरएच्या इमारतीच्या दहाव्या मजल्यावर ही आग लागली. आगीची वर्दी मिळताच अग्निशमन दलाच्या गाड्या घटनास्थळी तातडीने दाखल झाल्या. यानंतर अग्निशमन दलाच्या जवानांनी  १० आणि ११ व्या मजल्यावर अडकलेल्या पाच जणांपैकी तीन जणांना सुखरुपपणे बाहेर काढले. मात्र, दोघांचा होरपळून मृत्यू झाला. १००१ क्रमांकाच्या फ्लॅटमध्ये हे मृतदेह आढळून आले.

जवळपास दोन तासांच्या प्रयत्नानंतर सव्वादहाच्या सुमारास ही आग विझवण्यात यश आले. 

शॉकसर्किट झाल्यामुळे ही आग लागल्याचा प्राथमिक अंदाज आहे.  लाकडी फर्निचर आणि इतर घरातील वस्तुंमुळे आग वेगाने पसरली आणि ११ व्या मजल्यापर्यंत पोहोचली, अशी माहिती अग्निशमन दलाकडून देण्यात आली. 

Mumbai: 2 dead after a level-2 fire broke out on 10th & 11th floor in Kadam Chawl SRA building, near Oberoi Tower on Vira Desai road, Andheri (W), today at around 8:30 pm. #Maharashtra

— ANI (@ANI) November 13, 2018