രാജ്യത്ത് കോവിഡ് ബാധിതരുടെ എണ്ണം ഇന്നും 10,000 കടന്നു. 10,112 പേർക്കാണ് കഴിഞ്ഞ 24 മണിക്കൂറിനിടെ രോഗം സ്ഥിരീകരിച്ചത്. ഇതോടെ രാജ്യത്ത് കോവിഡ് ബാധിച്ച് ചികിത്സയിലുള്ളവരുടെ എണ്ണം 67,806 ആയി. രോഗമുക്തി നേടിയവരുടെ എണ്ണം 9833 ആണ്. ശനിയാഴ്ച 12,193 പേർക്കായിരുന്നു രാജ്യത്ത് കോവിഡ് സ്ഥിരീകരിച്ചിരുന്നത്. ഇന്ത്യയിൽ കോവിഡ് പടർന്നു പിടിച്ചതിന് ശേഷം 5,31,329 പേർ രോഗമുക്തി നേടിയതായി ആരോഗ്യ മന്ത്രാലയത്തിന്റെ കണക്കുകൾ വ്യക്തമാക്കുന്നു.
എക്സ്ബിബി.1.16 എന്ന കോവിഡ് വേരിയന്റാണ് ഇപ്പോൾ കേസുകൾ ഉയരാൻ കാരണമായിരിക്കുന്നതെന്നാണ് ശാസ്ത്രജ്ഞർ പറയുന്നത്. വാക്സിൻ എടുത്തതിനാലും കോവിഡ് പല തവണ വന്നുപോയതിനാലും പലരിലും പ്രതിരോധിശേഷി ഉണ്ടെന്നും അതിനാൽ ഇപ്പോൾ കോവിഡ് ബാധിച്ചാലും വലിയ പ്രശ്നങ്ങളൊന്നുമുണ്ടാകില്ലെന്നും അവർ പറയുന്നു.
എന്നിരുന്നാലും വാക്സിൻ എടുക്കാത്തവർ നിർബന്ധമായും വാക്സിൻ എടുക്കണമെന്നും പൊതുസ്ഥലങ്ങളിൽ മാസ്ക് ധരിക്കണമെന്നും സർക്കാർ വ്യക്തമാക്കിയിട്ടുണ്ട്. കോവിഡ് സാഹചര്യം സൂക്ഷ്മതലത്തിൽ (ജില്ല, ഉപജില്ലകൾ) പരിശോധിക്കാനും, സമയോചിതവും ഫലപ്രദവുമായ നടപടികൾ സ്വീകരിക്കാൻ സംസ്താന സർക്കാരുകൾക്ക് കേന്ദ്ര ആരോഗ്യമന്ത്രാലയം നിർദ്ദേശം നൽകിയിട്ടുണ്ട്.
അതേസമയം ഡൽഹിയിൽ കേസുകൾ വർധിക്കുകയാണ്. ഡൽഹിയിൽ ശനിയാഴ്ച 1,515 കോവിഡ് കേസുകളും ആറ് മരണങ്ങളും രേഖപ്പെടുത്തി. പോസിറ്റിവിറ്റി നിരക്ക് 26.46 ആണെന്ന് ആരോഗ്യ വകുപ്പ് വ്യക്തമാക്കുന്നു. പുതിയ മരണങ്ങൾ റിപ്പോർട്ട് ചെയ്തതോടെ ഡൽഹിയിൽ കോവിഡ് ബാധിച്ച് മരിച്ചവരുടെ എണ്ണം 26,595 ആയി ഉയർന്നു. ആകെ കേസുകളുടെ എണ്ണം 20,32,424 ആണ്. ശനിയാഴ്ചയുണ്ടായ ആറ് മരണങ്ങളിൽ ഒരു മരണത്തിന്റെ പ്രാഥമിക കാരണം കോവിഡാണെന്ന് ആരോഗ്യവകുപ്പ് അറിയിച്ചു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
