2023 ൽ ബോളീവുഡിൽ തന്‍റെ നഷ്ടപ്പെട്ട സാമ്രാജ്യം വീണ്ടെടുക്കാനൊരുങ്ങി കിംഗ് ഖാൻ

ബോളീവുഡിന്‍റെ കിരീടം വയ്ക്കാത്ത രാജാവെന്ന് അറിയപ്പെടുന്ന സൂപ്പർ താരമാണ് ആരാധകർ കിംഗ് ഖാൻ എന്ന് വിളിക്കുന്ന ഷാരൂഖ് ഖാൻ. എന്നാൽ അദ്ദേഹത്തിന്‍റെ താര പദവിക്ക് കഴിഞ്ഞ കുറച്ച് വർഷങ്ങളായി കോട്ടം സംഭവിക്കുന്ന കാഴ്ച്ചയാണ് സിനിമാ പ്രേമികൾക്ക് കാണാൻ സാധിക്കുന്നത്. 2014 ൽ പുറത്തിറങ്ങിയ ഹാപ്പി ന്യൂ ഇയറിന് ശേഷം അദ്ദേഹത്തിന്‍റെ ചിത്രങ്ങൾ ഒന്നും തന്നെ വലിയ വിജയമായി മാറിയിരുന്നില്ല. നീണ്ട കാലത്തെ ഇടവേളക്ക് ശേഷം ഷാരൂഖ് - കജോൾ ജോഡികൾ ഒന്നിച്ചഭിനയിച്ച് 2015 ൽ പുറത്തിറങ്ങിയ ദിൽവാലെയും, ഷാരൂഖ് ഒരു ആന്‍റി ഹീറോയായി അഭിനയിച്ച് 2017 ൽ പുറത്തിറങ്ങിയ റായീസ് എന്നീ ചിത്രങ്ങളിൽ പ്രേക്ഷകർ വലിയ പ്രതീക്ഷ അർപ്പിച്ചിരുന്നു എങ്കിലും ബോക്സ് ഓഫീസിൽ ഓളം സൃഷ്ടിക്കാനാകാതെ ഇവ കടന്ന് പോയി. 

എങ്കിലും 2017 ൽ പ്രഖ്യാപിച്ച ആനന്ദ്. എൽ. റായി - ഷാരൂഖ് കൂട്ടുകെട്ടിൽ വരുന്ന സീറോ എന്ന ചിത്രം ഷാരൂഖ് ആരാധകരും സിനിമാ പ്രേമികളും ഒരു പോലെ കാത്തിരുന്നു. ചിത്രത്തിൽ പൊക്കം കുറഞ്ഞ 'ബൗവ സിംഗ്' എന്ന കഥാപാത്രത്തെയായിരുന്നു ഷാരൂഖ് അവതരിപ്പിച്ചത്. ഇന്ത്യൻ സിനിമ ഇന്നേവരെ കാണാത്ത സ്പെഷ്യൽ എഫക്റ്റുകളും, വി.എഫ്.എക്സ് രംഗങ്ങളും ഉൾപ്പെടുത്തി ചിത്രീകരിച്ച ഈ ചിത്രത്തിന്‍റെ ആകെ ബഡ്ജറ്റ് 200 കോടി ആയിരുന്നു. വലിയ പ്രതീക്ഷയോടെ 2018 ഡിസംബറിൽ പുറത്തിറങ്ങിയ സീറോ ബോക്സ് ഓഫീസിൽ വൻ പരാജയമായി മാറി. 

ഇതോടെ നീണ്ട 4 വർഷക്കാലം ഷാരൂഖ് ഖാൻ അഭിനയ രംഗത്ത് നിന്ന് മാറി നിന്നു. ഇന്ത്യയിൽത്തന്നെ ഏറ്റവും കൂടുതൽ ആരാധകരുള്ള ഒരു സൂപ്പർ താരത്തിന്‍റെ ഈ പതനം ബോളീവുഡിലെ പാപ്പരാസികളും ഷാരൂഖിനെ വെറുക്കുന്നവരും ആഘോഷമാക്കി മാറ്റി. എന്നാൽ സിനിമാ പ്രേമികളുടെയും ഷാരൂഖ് ആരാധകരുടെയും കാത്തിരിപ്പിന് വിരാമം ഇട്ട്കൊണ്ട് നീണ്ട അഞ്ച് വർഷങ്ങൾക്ക് ശേഷം ഒരു ഷാരൂഖ് ചിത്രം ഔദ്യോഗികമായി പ്രഖ്യാപിച്ചു. വാർ, ബാങ്ങ് ബാങ്ങ് എന്നീ ആക്ഷൻ ചിത്രങ്ങൾ വെള്ളിത്തിരയിൽ എത്തിച്ച സിദ്ദാർത്ഥ് ആനന്ദ് സംവിധാനം ചെയ്യുന്ന പഠാൻ എന്ന ചിത്രം ആയിരുന്നു അത്. 

2023 ജനുവരി 25 ന് റിലീസ് പ്രഖ്യാപിച്ചുകൊണ്ടുള്ള ചിത്രത്തിന്‍റെ അനൗൺസ്മെന്‍റ് വീഡിയോ നിമിഷ നേരം കൊണ്ട് സോഷ്യൽ മീഡിയയിൽ തരംഗമായി മാറി. ഷാരൂഖ് ഖാനോടൊപ്പം ജോൺ എബ്രഹാം, ദീപികാ പദുക്കോൺ തുടങ്ങി ഒരു വൻ താരനിരയും ചിത്രത്തിൽ ഉണ്ട്. യാഷ് രാജ് പ്രൊഡക്ഷൻസാണ് പഠാൻ നിർമ്മിച്ചിരിക്കുന്നത്. യാഷ് രാജിന്‍റെ സ്പൈ യൂണിവേഴ്സിൽ ഉൾപ്പെട്ട ഒരു ചിത്രമാണ് പഠാൻ എന്നാണ് റിപ്പോർട്ടുകൾ. ഈ ചിത്രത്തിൽ സൽമാൻ ഖാൻ അദ്ദേഹത്തിന്‍റെ പ്രശസ്തമായ ടൈഗർ എന്ന കഥാപാത്രമായി അഭിനയിക്കുന്നുണ്ട്. 

ഇന്ത്യൻ സിനിമ ഇന്നേവരെ കാണാത്ത തരം ആക്ഷൻ രംഗങ്ങൾ പഠാനിൽ സിദ്ദാർത്ഥ് ആനന്ദ് ഒരുക്കിയിട്ടുണ്ടെന്നാണ് സൂചനകൾ. മുടി നീട്ടി വളർത്തി ഒരു പ്രത്യേക ലുക്കിലാണ് ഷാരൂഖ് ഈ ചിത്രത്തിൽ പ്രത്യക്ഷപ്പെടുന്നത്. ഈ കാരണങ്ങൾകൊണ്ട് തന്നെ 2023 ൽ ഏറ്റവും കൂടുതൽ കാത്തിരിക്കുന്ന ഒരു ചിത്രമാണ് പഠാൻ. പഠാൻ എന്ന സിനിമയുടെ റിലീസ് പ്രഖ്യാപിച്ച് ഒരു മാസം പിന്നിടുന്നതിന് മുൻപ് ഷാരൂഖ് തന്‍റെ അടുത്ത ചിത്രവും പ്രഖ്യാപിച്ചു. ബോളീവുഡിലെ ഏറ്റവും വലിയ ഹിറ്റ് മേക്കറായ രാജ്കുമാർ ഹിരാനിയോടൊപ്പമാണ് ഷാരൂഖിന്‍റെ 2023 ലെ രണ്ടാമത്തെ ചിത്രം പുറത്തിറങ്ങുന്നത്.

2023 ഡിസംബർ 23 ന് പുറത്തിറങ്ങുന്ന ഈ ചിത്രത്തിന്‍റെ പേര് ഡങ്കി എന്നാണ്. തപ്സി പന്നുവാണ് ഈ ചിത്രത്തിലെ നായിക. രാജ്കുമാർ ഹിരാനിയുടെ ചിത്രങ്ങളുടെ ശൈലിയിൽ കോമഡിയും റൊമാൻസും ഇമോഷനും എല്ലാം ഉൾപ്പെട്ട ഒരു കമ്പ്ലീറ്റ് എന്‍റർടൈനർ ആണ് ഡങ്കി എന്നാണ് സൂചന. കുടിയേറ്റക്കാരുടെ പ്രശ്നങ്ങളാണ് ഡങ്കി ചർച്ച ചെയ്യുന്നത്. ചിത്രത്തിനെപ്പറ്റിയുള്ള മറ്റ് വിവരങ്ങൾ ഒന്നും തന്നെ ഇതുവരെ പുറത്ത് വന്നിട്ടില്ല. റിലീസ് തീയതി ഇതുവരെ പ്രഖ്യാപിച്ചിട്ടില്ലെങ്കിലും 2023 ൽ പുറത്തിറങ്ങുമെന്ന സൂചനകൾ ഉള്ളതാണ് ഷാരൂഖ് - ആറ്റ്ലീ കൂട്ട്കെട്ടിൽ പുറത്തിറങ്ങുന്ന ഈ ചിത്രം. 

നയൻതാരയാണ് ചിത്രത്തിലെ നായിക. ചിത്രത്തിന്‍റെ പേര് ഉൾപ്പെടെയുള്ള യാതൊരു വിവരങ്ങളും ഇതുവരെ പുറത്ത് വന്നിട്ടില്ല. ഈ സിനിമയിൽ ഷാരൂഖ് ഇരട്ട വേഷത്തിലാണ് അഭിനയിക്കുന്നതെന്നും, ഇത് ഒരു ആക്ഷൻ ത്രില്ലർ ചിത്രം ആകും എന്ന തരത്തിൽ അഭ്യുഹങ്ങൾ ഉണ്ട്.  ആറ്റ്ലീ തമിഴിൽ വിജയ് യെ നായകനാക്കി പുറത്തിറക്കിയ മെരസൽ, ബിഗിൽ എന്നീ ചിത്രങ്ങൾ ബോക്സ് ഓഫീസിൽ വൻ തരംഗം സൃഷ്ടിച്ചിരുന്നു.  ഷാരൂഖിനെ നായകനാക്കി ആറ്റ്ലീ ഹിന്ദിയിൽ ചുവട് വയ്ക്കാനൊരുങ്ങുമ്പോൾ ചിത്രത്തിന്‍റെ ഭാവി എന്താകും എന്ന് അറിയാനുള്ള ആകാംഷയിലാണ് ചലച്ചിത്രലോകം. 

2004 ന് ശേഷം മൂന്ന് ഷാരൂഖ് ചിത്രങ്ങൾ പ്രദർശനത്തിനെത്തുന്ന വർഷമാണ് 2023. 2004 ൽ പുറത്തിറങ്ങിയ ഷാരൂഖ് ചിത്രങ്ങളിൽ വീർ സാരാ, മെയിൻ ഹൂൻ നാ എന്നീ ചിത്രങ്ങൾ ബോക്സ് ഓഫീസിൽ വൻ വിജയം ആയിരുന്നു. 2004 ൽ തന്നെ പുറത്തിറങ്ങിയ സ്വദേശ് എന്ന ചിത്രം ബോക്സ് ഓഫീസിൽ പരാജയപ്പെട്ടെങ്കിലും ധാരാളം നിരൂപക പ്രശംസ പിടിച്ച് പറ്റി. ഈ ചിത്രത്തിലെ അഭിനയത്തിന് ഷാരൂഖിന് മികച്ച നടനുള്ള ഫിലിം ഫെയർ പുരസ്കാരം ലഭിച്ചു. 2004 ലേതിന് സമാനമായി വളരെയധികം പ്രതീക്ഷ പകരുന്ന മൂന്ന് ചിത്രങ്ങളാണ് 2023 ൽ റിലീസിനൊരുങ്ങുന്നത്.

ഈ ചിത്രങ്ങൾ വിജയം കൈവരിക്കുകയാണെങ്കിൽ ബോളീവുഡ് ഇന്നേവരെ കണ്ടിട്ടുള്ളതിൽ വച്ച് ഏറ്റവും വലിയ തിരിച്ച് വരവിന് 2023 സാക്ഷിയാകും എന്നതിൽ സംശയമില്ല. പഠാന്‍റെ ചിത്രീകരണം 90% പൂർത്തിയാക്കിയ ഷാരൂഖ് ഖാൻ നിലവിൽ ആറ്റ്ലീ ചിത്രത്തിന്‍റെയും ഡങ്കിയുടെയും ഷൂട്ടിങ്ങിൽ ആണ്.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...

android Link - https://bit.ly/3b0IeqA

ios Link - https://apple.co/3hEw2hy