दिव्यांग चाहतीने साकारलेलं चित्र पाहताच सलमानने दिली 'ही' प्रतिक्रिया
सलमानच्या लोकप्रियतेचा आलेख हा उंचावतच आहे
)
मुंबई : 'दबंग खान' म्हणून कलाविश्वात नावाजलेल्या अभिनेता सलमान खान याच्या चाहत्यांचा आकडा कित्येक वर्षांपासून वाढतच आहे. दर दिवसागणिक आणि दर चित्रपटागणिक सलमानच्या लोकप्रियतेचा आलेख हा उंचावत आहे. चाहत्यांच्या याच प्रेमाच्या बळावर आपण, आज या टप्प्यावर पोहोचल्याची प्रतिक्रिया सलमानही देतो. सध्या त्याला चाहत्यांच्या याच गर्दीत एक असा चेहरा भेटला आहे जो खऱ्या अर्थाने खास आहे.
सोशल मीडियाच्या माध्यमातून चाहत्यांसोबतचं नातं आणखी दृढ करणाऱ्या सलमानने सोशल मीडियावर एक व्हिडिओ शेअर केला आहे. या व्हिडिओमध्ये एक दिव्यांग कलाकार आणि चाहती सलमानचं सुरेख असं चित्र साकारताना दिसत आहे. तिच्यापाशी असणाऱ्या मोबाईलमधील सलमानचा फोटो आणि तिने रेखाटलेलं चित्र पाहता त्यामध्ये बरंच साम्य आणि बारकावे टीपले गेल्याचं लक्षात येत आहे.
सलमानच्या चाहतीची ही कला पाहता नेटकरीही थक्क झाले आहेत. आतापर्यंत लाखो फॉलोअर्सनी हा व्हिडिओ पाहिला असून, त्यावर कमेंट करत तिच्या कलेची दाद दिली आहे. चाहती सलमानचं चित्र साकारत असताना व्हिडिओमध्ये 'हॅलो ब्रदर' या चित्रपटातील 'तेरी चुनरिया...' हे गाणंही वाजत आहे. कामाच्या व्यापात व्यग्र असूनही सलमानने त्याच्या चाहत्यांशी नातं जपण्याचा अनोखा अंदाज पाहता तो पुन्हा एकदा अनेकांचीच मनं जिंकत आहे.