'दिल दोस्ती दुनियादारी' फेम अभिनेत्याची 'छावा' चित्रपटात वर्णी; विकी कौशलसोबत झळकणार

(Photo Credit : Social Media)

Dil Dosti Duniyadari Fame Actor in Chhaava Movie : 'छावा' चित्रपटाचा काल 22 जानेवारी रोजी ट्रेलर प्रदर्शित झाला. त्यामुळे 'छावा' सध्या चांगलाच चर्चेत आहे. या चित्रपटाच्या ट्रेलरनं प्रेक्षकांचं मन तर जिंकून घेतलं आहे. पण या चित्रपटात बॉलिवूडमधल्या बड्या कलाकारांच्या सोबतीनं मराठमोळा अभिनेता सुव्रत जोशी देखील दिसणार आहे. त्याविषयी त्याची काय भावना आहे हे सुव्रतनं सांगितलं आहे. 

या विषयी बोलताना सुव्रत म्हणाला, "एकतर छत्रपती संभाजी महाराज यांच कार्य जगभरात माहिती व्हायला हवं. दुर्दैवानं त्यांचा इतिहास हा लोकांना फारसा माहीत नाही आणि  त्यांच्या कार्याची महती प्रेक्षकांना समजावी म्हणून दिग्दर्शक लक्ष्मण उतेकर सरांनी यावर चित्रपट करायचा ठरवला. मी या चित्रपटाचा एक भाग आहे ही गोष्ट माझ्यासाठी खूप जास्त आनंद देणारी आहे. महाराजांच्या काळातल्या ऐतहासिक चित्रपटात मला काम करण्याची इच्छा होती आणि ती या चित्रपटाच्या निमित्तानं पूर्ण होत आहे. लक्ष्मण सरांसारखा दिग्दर्शक आणि त्यांची काम करण्याची पद्धत कमालीची आहे. हिंदीत मराठीत त्यांनी आजवर जे काम केलं ते उत्कृष्ठ आहे आणि त्यांच्या सोबतीनं काम करून अनेक गोष्टी शिकता आल्या. विकी कौशल हा कमालीचा अभिनेता आहे. सेटवर प्रचंड मेहनत करून त्यानं ही भूमिका साकारली या चित्रपटात त्यांचा सोबतीनं काम तर केलं पण अभिनेता म्हणून अनेक गोष्टी त्याचाकडून शिकलो."

View this post on Instagram

चित्रपटासाठी सगळ्यांनी काय काय केलं हे सांगत तो पुढे म्हणाला, "चित्रपट करताना प्रत्येक सीन करण्यासाठी आम्ही सगळेच रिहर्सल करायचो आणि प्रत्येक कलाकार त्याचा सह कलाकाराच्या सीन साठी ( क्यू ) द्यायला उभा राहायचा. मेकअप, कॉस्ट्यूम, आर्ट सगळ्या टीमने अहो रात्र मेहनत करून चित्रपट तयार केला आहे. रायगडचा सेट एकदा मांडला होता तेव्हा सेटवर फक्त ऐतिहासिक वेशभूषेतील कलाकार सेटवर होते. तेव्हा असं वाटलं की आपण खरोखर हा सगळा काळ जगतोय अनुभवतोय. उन्हाची, कपडेपटाची पर्वा न करता चित्रपटातील प्रत्येक कलाकाराने खूप उत्तम काम केलं आणि फक्त भारतात नाही तर जगभरात हा चित्रपट पोहचावा ही माझी इच्छा आहे."

हेही वाचा : 'शोर नही, सिधा शिकार...', अंगावर काटा आणणारं संभाजी महाराजांचं रुप पाहून कराल 'जय भवानी'चा जयघोष

आता सुव्रत 'छावा' चित्रपटात नक्की काय भूमिका साकारणार हे बघण उत्कंठावर्धक ठरणार आहे. सोबतीला सुव्रत त्याचं बहुचर्चित नाटकं "वरवरचे वधू वर" करण्यात सध्या व्यस्त आहे. 2025 मध्ये सुव्रत अनेक प्रोजेक्ट्समध्ये देखील दिसणार आहे.