आई आणि मुलामध्ये संबंध असल्याचा संशय, बापाने खोलीत पाडला रक्ताचा सडा; मुलगी आली तर बेडवरच...
Crime News: पत्नी आणि मुलामध्ये अनधिकृत संबंध असल्याचा संशय आल्याने एका व्यक्तीने पत्नीची हत्या केल्याची घटना समोर आली आहे. हत्येनंतर आरोपीने घरातून पळ काढला होता. यानंतर मुलगी घऱात पोहोचली असता बेडवर आईचा रक्ताच्या थारोळ्यात पडलेला मृतदेह पाहून तिला धक्काच बसला.
)
Crime News: संशयाची सुई माणसाला कोणत्याही थराला घेऊन जाते. एकदा संशयाचं भूत डोक्यात शिरलं की, मग माणसाला आपण जे समोर पाहत आहोत त्यापेक्षा जो विचार करत आहोत तेच सत्य वाटू लागतं. अनेकदा हा संशय माणसाच्या हातून अनपेक्षित गोष्टी घडवतो ज्याचा नंतर फक्त पश्चाताप होऊ शकतं. पश्चिम बंगालमध्ये अशाच संशयातून एक व्यक्तीने आपला संसार उद्ध्वस्त केला आहे. पतीने आपल्या पत्नीची हत्या करुन पळ काढला आहे. धक्कादायक म्हणजे, त्याला आपल्या पत्नी आणि मुलामध्येच संबंध असल्याचा संशय होता.
पश्चिम बंगालच्या (West Bengal) पूर्व वर्धमान जिल्ह्यात एका महिलेची अत्यंत निर्घृणपणे हत्या (Crime) करण्यात आली आहे. महिलेच्या पतीवरच हत्येचा आरोप करण्यात आला आहे. हत्येनंतर पती फरार असून पोलीस त्याचा शोध घेत आहेत. पत्नी आणि आपल्या मुलामध्ये अनधिकृत संबंध असल्याचा त्याला संशय होता. याप्रकरणी आरोपीच्या मुलीनेच पोलीस ठाण्यात तक्रार दाखल केली आहे.
कालना तालपुकूर परिसरात ही धक्कादायक घटना घडली आहे. येथे मदन बाग आपली पत्नी ठाकुराणी बाग, दोन मुली आणि मुलांसहित राहत होता. महिलेच्या भावाने दिलेल्या माहितीनुसार, मदन याला आपली पत्नी आणि 16 वर्षीय मुलामध्ये संबंध असल्याचा संशय होता. यामुळेच भाचा आमच्यासोबत राहत होता. तो मालदा येथील एका हॉटेलमध्ये काम करत होता. जमाई षष्ठीसाठी तो घरी आला होता.
पुढे त्यांनी सांगितलं आहे की, बहिणीने आपल्या मुलाला पाहण्याची इच्छा व्यक्त केली असावी. यामुळेच भावोजी आणि आपल्या बहिणीत त्या रात्री जोरदार भांडण झालं. यानंतर त्याने धारदार शस्त्राने हत्या केली आणि फरार झाला. सकाळ झाली तरी आई खोलीच्या बाहेर न आल्याने मुलींनी आत जाऊन पाहिलं असता त्यांना धक्काच बसला. कारण तिथे बेडवर रक्ताच्या थारोळ्यात आईचा मृतदेह पडलेला होता.
यानंतर सर्व नातेवाईकांना घटनेची माहिती देण्यात आली. हत्येची माहिती मिळताच परिसरात खळबल उडाली आहे. पोलिसांनीही घटनास्थळी धाव घेत तपास सुरु केला आहे. पोलिसांनी मृतदेह ताब्यात घेत शवविच्छेदनासाठी मेडिकल कॉलेजला पाठवला आहे. दरम्यान याप्रकरणी आरोपीच्या मुलीने पोलीस ठाण्यात तक्रार दाखल केली आहे.
पोलीस सध्या आरोपीचा शोध घेत आहेत. कलना पोलीस ठाण्याचे प्रभारी देबाशीष नाग यांनी सांगितलं आहे की, आरोपी सध्या फरार आहे. पोलिसांचं पथक त्याचा शोध घेत आहे.