खडसे म्हणजे भाजपचे अजित पवार, उद्धव ठाकरेंची टीका

नांदेड: शिवसेना पक्षप्रमुख उद्धव ठाकरेंनी महसूलमंत्री एकनाथ खडसे यांच्यावर घणाघाती टीका केलीय. उद्धव ठाकरेंनी खडसेंची तुलना थेट अजित पवारांसोबत करत, खडसे म्हणजे भाजपचे अजित पवार असं म्हटलंय.

उद्धव ठाकरे आजपासून मराठवाड्यातील दुष्काळग्रस्त भागाच्या दौऱ्यावर आहेत. या दौऱ्याची सुरुवात त्यांनी नांदेडमधून केली. बाभुलगाव इथल्या आत्महत्या केलेल्या शेतकऱ्यांच्या कुटुंबियांची भेट घेऊन त्यांचं सांत्वन केलं. आमचा हा दौरा 'पीपली लाइव्ह'सारखा नसून आम्ही थेट मैदानात उतरुन परिस्थितीची माहिती करुन घेतो असा टोलाही त्यांनी एकनाथ खडसेंच्या दुष्काळग्रस्त भागातील दौऱ्याला उद्देशून लगावला आहे.

एकनाथ खडसेंनी काल अकोल्यात शेतकऱ्यांची थट्टा करणारं वक्तव्य केलं. शेतकऱ्यांना वीजबिलं माफ करा, अशी  मागणी खडसे विरोधीपक्षात बसलेले असतांना करत होते, मात्र सत्तेत आल्यानंतर त्यांचा सूर बदलला आहे. मोबईलचं बिल हजार रुपये येतं तेव्हा कनेक्शन तुटण्याच्या भीतीनं ते भरता. मग वीजबिलं का भरत नाही असा सवाल  खडसेंनी शेतकऱ्यांना केला होता. खडसेंच्या याच वक्तव्याचा उद्धव ठाकरेंनी समाचार घेतलाय. 

दरम्यान, शेतकऱ्यांनी आत्महत्या करणार नाही, असं वचन द्यावं अशी भावनिक साद घालत शिवसेना पक्षप्रमुख उद्धव ठाकरे यांनी नांदेडमधील शेतकऱ्यांशी संवाद साधला. शिवसेना नेहमीच शेतकऱ्यांसोबत असून विरोधी पक्ष म्हणून आम्ही शेतकऱ्यांना न्याय मिळवून देऊ, असं आश्वासनही त्यांनी शेतकऱ्यांना दिलं. 

* इतर ताज्या बातम्या सदैव पाहण्यासाठी झी २४ तासला फेसबुकवर जॉइंन करा.