Corona: लस घेतल्याने होतोय मोठा फायदा, मृत्यूच्या संख्येत इतकी मोठी घट

मुंबई : लस घेतल्यानंतर कोरोना संसर्ग होण्याचा धोका बर्‍याच प्रमाणात कमी होतो. इटलीमधील नुकत्याच झालेल्या संशोधनात असे दिसून आले आहे की लस घेतल्यानंतर कोरोनाचा संसर्ग आणि त्यातून मृत्यू होण्याचा धोका कमी होतो. फायझर, माडर्ना आणि अ‍ॅस्ट्रॅजेनेकाच्या पहिल्या डोसच्या पाच आठवड्यांनंतर, सर्व वयोगटातील प्रौढांमध्ये कोरोना संसर्ग 80 टक्क्यांपर्यंत कमी झाला.

इटलीची राष्ट्रीय आरोग्य संस्था (ISA) आणि आरोग्य मंत्रालयाकडून आतापर्यंत 1.37 कोटी लोकांना लसी देण्यात आल्या आहेत. लसीकरण सुरू होण्याच्या दिवसापासून 27 डिसेंबर 2020 ते 3 मे 2021 या कालावधीत शास्त्रज्ञांनी अभ्यास केला. अभ्यासानुसार असे दिसून आले आहे की सुरुवातीच्या लसीकरणानंतर पहिल्या दोन आठवड्यात सार्स-सीओव्ही -2 संक्रमण, रुग्णालयात दाखल होण्यांच्या संख्येत आणि मृत्यूच्या संख्येत लक्षणीय घट झाली आहे.

आयएसएसने म्हटले आहे की, प्रथम डोस घेतल्यानंतर 35 दिवसानंतर संसर्गात 80 टक्के, रुग्णालयात दाखल होण्याच्या बाबतीत 95 टक्के आणि मृत्यूंमध्ये 95 टक्के घट झाली आहे. आयएसएसने नमूद केले की, हा परिणाम सर्व वयोगटातील लोक आणि महिला आणि पुरुषांमध्ये सारखाच दिसून आला. आयएसएसचे अध्यक्ष सिल्वियो ब्रुसफेरो म्हणाले की, ही माहिती लसीकरण मोहिमेची उपयुक्तता सिद्ध करते. आपत्कालीन परिस्थिती दूर करण्यासाठी जास्तीत जास्त लोकांना लसी देणे किती महत्त्वाचे आहे हे देखील यातून दिसून आले आहे.

जगभरात कोरोनाचं संकट कायम आहे. कोरोनाचे नवीन व्हेरिएंट चिंता वाढवत आहेत. आतापर्यंत अनेकांनी आपला जीव गमवला आहे. त्यामुळे प्रत्येकाने लवकरात लवकर लस घेणं महत्त्वाचं आहे.