புதிதாக பிரிக்கப்பட்ட 9 மாவட்டங்கள் தவிர்த்து மற்ற மாவட்டங்களில் உள்ளாட்சித் தேர்தல் நடத்த அனுமதித்தது உச்சநீதிமன்றம்!!
தமிழகத்தில் கிராமப்புற உள்ளாட்சி அமைப்புகளுக்கு வருகிற 27 மற்றும் 30 ஆகிய தேதிகளில் இரண்டு கட்டங்களாக தேர்தல் நடத்தப்படும் என தேர்தல் ஆணையம் அறிவித்தது. வேட்புமனுத் தாக்கல் இன்று தொடங்க உள்ள நிலையில், உள்ளாட்சித் தேர்தல் அறிவிப்பை ரத்து செய்யக்கோரி உச்ச நீதிமன்றத்தில் திமுக தரப்பில் புதிய மனு தாக்கல் செய்யப்பட்டது.
அதில், வார்டு மறுவரையறை முழுமையாக நிறைவடையும் வரை தேர்தல் நடத்த தடை விதிக்க வேண்டும் என கூறப்பட்டுள்ளது. திமுகவின் புதிய மனு மற்றும், 5 புதிய மாவட்டங்களின் வாக்காளர்கள் தாக்கல் செய்த மனுக்கள் மீதான விசாரணை நேற்று நடைபெற்றது. அப்போது உரிய சட்ட முறைகளை கடைபிடிக்காமல் உள்ளாட்சித் தேர்தல் அறிவிக்கப்பட்டுள்ளதாக திமுக தரப்பு வழக்கறிஞர் வாதிட்டார். 2011 மக்கள்தொகை கணக்கெடுப்பு அடிப்படையில் வார்டு மறுவரையறை பணிகள் மேற்கொள்ளப்பட்டதாகவும், புதிய மாவட்டங்கள் உருவாக்கப்பட்ட பின் அவற்றில் தொகுதி மறுவரையறை செய்ய தேவையில்லை என்றும் மாநில தேர்தல் ஆணையம் தரப்பில் தெரிவிக்கப்பட்டது.
தொகுதி மறுவரையறை தேவையில்லை என்ற வாதத்தை ஏற்க முடியாது என்று கூறிய நீதிபதிகள், பழைய நிலையே தொடரும் என்றால் மூன்று மாவட்டங்களுக்கு ஒரே மாவட்ட பஞ்சாயத்தா? என்று அடுக்கடுக்கான கேள்விகளை முன்வைத்தனர். தேர்தல் அறிவிக்கப்பட்டு நடத்தை விதிகள் நடைமுறைக்கு வந்தபிறகு நீதிமன்றத்தினால் தேர்தலை ரத்து செய்ய முடியாது என்ற நீதிபதிகள், தேவைப்பட்டால் உள்ளாட்சித் தேர்தலை நிறுத்தி வைக்க முடியும் என்றனர். இதற்கு பதிலளித்த தமிழக அரசு தரப்பில் ஆஜரான வழக்கறிஞர் தொகுதி மறுவரையறை செய்யப்படவில்லை என நினைத்தால் பிரிக்கப்பட்ட 9 மாவட்டங்களில் மட்டும் தேர்தலை தள்ளிவையுங்கள் என்றார்.
இதையடுத்து 9 மாவட்டங்கள் தவிர, மற்ற மாவட்டங்களில், ஊரக உள்ளாட்சித் தேர்தலை நடத்த தயாராக இருப்பதாக, தமிழ்நாடு மாநில தேர்தல் ஆணையம் உறுதியளித்தது. இதற்கு, திமுக தரப்பில் கடும் ஆட்சேபம் தெரிவிக்கப்பட்டது. இருதரப்பு வாதங்களையும், கேட்ட நீதிபதிகள், வழக்கின் தீர்ப்பை ஒத்திவைத்தனர். அந்த வழக்கு இன்று காலை 10.30 மணியளவில் விசாரணை செய்து இதற்க்கு தீர்ப்பை வழங்கியுள்ளது உச்சநீதிமன்றம்.
அதில், புதிதாக பிரிக்கப்பட்ட 9 மாவட்டங்கள் தவிர்த்து மற்ற மாவட்டங்களில் உள்ளாட்சித் தேர்தல் நடத்த உச்சநீதிமன்றம் அனுமதித்துள்ளது. இதனிடையே மறு உத்தரவு வரும் வரை ஊரக உள்ளாட்சித் தேர்தலுக்கான வேட்புமனுக்களை இன்று காலை பெற வேண்டாம் என்று மாநில தேர்தல் ஆணையம் மாவட்ட ஆட்சியர்களுக்கு சுற்றறிக்கை அனுப்பி இருப்பது குறிப்பிடதக்கது.
