KSRTC Strike: കെഎസ്ആർടിസിയിലെ ഒരു വിഭാഗം ജീവനക്കാർ നടത്തുന്ന പണിമുടക്ക് തുടരുന്നു

KSRTC 24 Hours Strike Begins: ഇന്ന് രാത്രി 12 വരെയാണ് പണിമുടക്ക്. ശമ്പളവും പെൻഷനും കൃത്യമായി വിതരണം ചെയ്യണമെന്ന് ആവശ്യപ്പെട്ടുകൊണ്ടാണ് പണിമുടക്ക്.

തിരുവനന്തപുരം: കെഎസ്ആർടിസിയിലെ ഒരു വിഭാഗം ജീവനക്കാരുടെ പണിമുടക്ക് തുടരുന്നു. ഇന്ന് രാത്രി 12 വരെയാണ് പണിമുടക്ക്. 24 മണിക്കൂർ പണിമുടക്ക് തിങ്കളാഴ്ച അർധരാത്രി മുതലാണ് ആരംഭിച്ചത്. ശമ്പളവും പെൻഷനും കൃത്യമായി വിതരണം ചെയ്യണമെന്ന് ആവശ്യപ്പെട്ടുകൊണ്ടാണ് പണിമുടക്ക്. 

പണിമുടക്കിനെ നേരിടാന്‍ സര്‍ക്കാര്‍ ഡയസ്നോം പ്രഖ്യാപിച്ചിട്ടുണ്ട്. കോൺഗ്രസ് അനുകൂല യൂണിയനുകളുടെ കൂട്ടായ്മയായ ട്രാൻസ്പോർട്ട് ഡെമോക്രാറ്റിക്ക് ഫെഡറേഷനാണ് പണിമുടക്കുന്നത്. ശമ്പളവും പെൻഷനും കൃത്യമായി വിതരണം ചെയ്യുക, 31% ഡിഎ കുടിശിക അനുവദിക്കുക, ദേശസാൽകൃത റൂട്ടുകളുടെ സ്വകാര്യവത്ക്കരണം അവസാനിപ്പിക്കുക തുടങ്ങി 12 ആവശ്യങ്ങൾ ഉന്നയിച്ചാണ് സമരം നടത്തുന്നത്. 

ഇതിനിടയിൽ പണിമുടക്കിനെ കർശനമായി നേരിടാൻ മാനേജ്മെന്റിന് സർക്കാർ‍ നിർദേശം നൽകിയിട്ടുണ്ട്. പണിമുടക്ക് ദിവസം ഓഫീസർമാർ ജോലിയിലുണ്ടാകണം എന്നും നിർദേശിമുണ്ട്. പരമാവധി താൽക്കാലിക ജീവനക്കാരെ ഡ്യൂട്ടിക്ക് ഇറക്കി സർവീസുകൾ നടത്താനും ഹാജരാകാത്ത താൽക്കാലിക ജീവനക്കാരെ മാറ്റിനിർത്താനും ആരോഗ്യ അത്യാഹിതങ്ങളിൽ ഒഴികെ അവധി നൽകരുതെന്നുമാണ് നിർദേശം നൽകിയിരിക്കുന്നത്. 

അതേസമയം ഡയസ്നോൺ പ്രഖ്യാപിച്ച് പണിമുടക്ക് അട്ടിമറിക്കാനുള്ള നീക്കം വിലപ്പോവില്ലെന്നും പ്രശ്നങ്ങൾക്ക് പരിഹാരം കാണുന്നതുവരെ ശക്തമായ സമരവുമായി മുന്നോട്ട് പോകുമെന്നും ടിഡിഎഫ് സംസ്ഥാന പ്രസിഡന്റ് തമ്പാനൂർ രവി, വർക്കിങ് പ്രസിഡന്റ് എം വിൻസന്റ് എംഎൽഎ, ജനറൽ സെക്രട്ടറി വി എസ് ശിവകുമാർ എന്നിവർ അറിയിച്ചിട്ടുണ്ട്.

ശമ്പളത്തിനും മറ്റ് ആനുകൂല്യത്തിനും സമരം ചെയ്തത് കൊണ്ട് കിട്ടുമെന്ന് ആരും വിചാരിക്കണ്ടെന്നും. ഒന്നാം തിയതി ശമ്പളം തരുമെന്ന് പറഞ്ഞാൽ തന്നിരിക്കുമെന്നും ശമ്പളം തരാൻ വേണ്ടി ബാങ്കിൽ ഫണ്ട് വിതരണത്തിനായി ബന്ധപ്പെട്ടവർ നിൽക്കുമ്പോൾ സമരവും മുദ്രാവാക്യം വിളിയും നല്ലതാണോ എന്ന് സമരക്കാർ ചിന്തിക്കണമെന്നും  ഗതാഗത മന്ത്രി പ്രതികരിച്ചു.