'माझा बाप जगातला सर्वोत्कृष्ट बाप नसला तरी...', धनंजय मुंडे आणि करुणा शर्मांच्या मुलाची पोस्ट, 'आईनेच खरं तर...'

Seeshiv Dhananjay Munde Post: वांद्रे कौटुंबिक न्यायालयाने धनंजय मुंडे यांना करुणा शर्मांना 2 लाखांचा देखभाल खर्च देण्याचा आदेश दिला आहे. दरम्यान यानिमित्ताने पुन्हा एकदा धनंजय मुंडे आणि करुणा शर्मा चर्चेत आले आहेत. कोर्टाच्या निर्णयानंतर करुणा शर्मा यांनी पत्रकार परिषद घेत धनंजय मुंडे यांच्यावर पुन्हा एकदा गंभीर आरोप केले आहेत. मात्र यादरम्यान त्यांचा मुलगी सिशिव मुंडे याने इंस्टाग्रामला एक पोस्ट शेअर केली आहे. यामध्ये त्याने वडिलांची बाजू घेतली असून, आईकडूनच सर्वांना त्रास होत होता असा खुलासा केला आहे. 

कोर्टाने धनंजय मुंडे यांना करुणा शर्मांना जी 2 लाखांची देखभाल खर्च देण्यास सांगितली आहे त्यातील 1 लाख 25 हजार उदरनिर्वाहासाठी आहेत. तर 75 हजार मुलीचं लग्न होईपर्यंत तिच्या देखभालीसाठी आहेत. मुलगा सज्ञान असल्याने त्याला कोणतेही पैसे मिळणार नाहीत. मात्र करुणा शर्मा या निर्णयाला उच्च न्यायालयात आव्हान देणार आहेत.

करुणा शर्मा व धनंजय मुंडे यांचा 18 वर्षांचा मुलगा शिशीव धनंजय मुंडे याने पोस्ट टाकून खालील प्रमाणे खुलासा केला आहे. "मी सीशिव धनंजय मुंडे, मला आता बोलणं भाग आहे कारण माध्यमांनी आमच्या कुटुंबाला मनोरंजनाचा विषय बनवून टाकलं आहे. माझा बाप जगातला सर्वोत्कृष्ट बाप नसला तरी तो आम्हा भावंडांसाठी कधीही हानिकारक नव्हता.  माझी आई कायम तिच्या अनेक विविध कारणांमुळे बाधित असायची आणि त्याचा वचपा ती आम्हाला वेदना देऊन काढायची", असा खुलासा त्याने केला आहे. 

पुढे त्याने म्हटलं आहे की, "जो घरगुती हिंसाचार तिच्यासोबत झाला असा ती दावा करते तो खरं तर मी, माझी बहीण व माझे वडील यांच्यासोबत तिच्याकडून व्हायचा.  माझ्या वडिलांना तिच्याकडून होणारा शारीरिक व मानसिक जाच असह्य झाल्यानंतर ते तिला सोडून गेल्यावर तिने मला व माझ्या बहिणीलासुद्धा घर सोडून जायला सांगितलं. कारण तिच्या मते तिचा व आमचा ( जन्मदाती आई असुनही) काहीही संबंध राहिला नव्हता".   

"2020 या वर्षापासून आमचे वडीलच आमची सर्वस्वी काळजी घेत आहेत. माझ्या आईला कोणत्याही आर्थिक विवंचना नाहीत. तरीसुद्धा तिने घराचे कर्जाचे हप्ते भरायचे नाही असे जाणीवपूर्वक ठरवले आणि माझ्या वडिलांचा बदला घेण्यासाठी कायम खोट्यानाट्या गोष्टी पसरवत असते," असंही त्याने सांगितलं आहे.