लष्करी अरेरावी; सहा जणांना चालत्या रेल्वेतून फेकलं!

www.24taas.com, झी मीडिया, लखनौ
भारतीय लष्करी जवानांची अरेरावी सहा तरुणांच्या जीवावर बेतलीय. चुकून सैन्यासाठी राखीव असलेल्या रेल्वेच्या डब्यात चढलेल्या या सहा जणांना लष्करी जवानांनी धावत्या गाडीतून बाहेर फेकलं. मंगळवारी लखनौमध्ये ही घटना घडलीय.
अवध आसाम एक्सप्रेस मोरादाबाद स्थानकावर आली... पण इम्तियाज अली, गुडुडू, रऊफ, पंकज, पटवाई व रवी या सहा जणांना गाडी पकडण्यास उशीर झाला... गर्दीमुळे आणि घाईगडबडीत सगळ्यांनी समोर असलेल्या डब्यात चढणं योग्य समजलं. कसाबासा त्यांनी तो डबा पकडला पण हा डबा सैन्य दलासाठी राखीव असल्याचं त्यांच्या नंतर लक्षात आलं. पण एव्हानं गाडीनं स्टेशन सोडलं होतं. त्यामुळे उतरणं शक्य नव्हतं.
पण या सहा जणांना पाहून गाडीत अगोदरपासूनच बसललेल्या लष्करी जवानांनी हरकत घेतली. ही अरेरावी एव्हढी वाढली की या सहाही जणांना जवानांनी एकामागून एक चालत्या गाडीतून खाली फेकलं, असं जखमी तरुणांनी सांगितलंय. या सहा प्रवाशांपैकी पाच तरुणांना किरकोळ जखम झाली आहे तर एकाच्या डोक्याला गंभीर दुखापत झालीय.