लोकसभा निवडणुकीसाठी सज्ज राहा - शरद पवार

www.24taas.com ,झी मीडिया, पनवेल
लोकसभा निवडणुकांसाठी सज्ज राहण्याचे सूचना केंद्रीय कृषीमंत्री आणि राष्ट्रवादी काँग्रैसचे अध्यक्ष शरद पवार यांनी आज रायगडमध्ये दिली.पवार आज रायगडमध्ये विविध कार्यक्रमांना उपस्थित होते. त्यावेळी ते बोलत होते.
तेलंगणाच्या मुद्यावरुन केंद्रात आणखी काही खासदार राजीनामा देण्याची शक्यता आहे. त्यामुळे लोकसभा निवडणुकांसाठी सज्ज राहण्याचे आवाहन पवार यांनी कार्यकर्त्यांना केले आहे.
साखर कारखाना गैरव्यवहारांवरुन ज्येष्ठ समाजसेवक अण्णा हजारे आणि मेधा पाटकर यांनी केलेल्या आरोपांचा शरद पवारांनी चांगलात समाचार घेतला आहे. सध्या आरोप करण्याची फॅशन झाल्याचा टोला पवारांनी लगावला आहे. तसंच आपलं गणित कच्चं असून दहा हजार कोटी म्हणजे किती हे आपल्याला कळत नसल्याची खोचक टीका पवार यांनी केली आहे.
आगामी लोकसभा निवडणूक आपण लढवणार नसल्याचेही शरद पवार यांनी रोह्यात पुन्हा एकदा म्हटलं आहे. फेब्रुवारीत राज्यसभेच्या आठ जागा रिक्त होत आहेत. त्यातील दोन राष्ट्रवादी काँग्रेसच्या आहेत. त्यातल्या एका जागेवरून पवार राज्यसभेत जाणार आहेत या चर्चेतही तथ्य असल्याचं ते म्हणाले.
कलंकित नेत्यांनी निवडणूक लढवण्याबाबतचा वटहुकूम मागे घेण्यात काही गैर नसल्याचं सांगत पवारांनी यूपीए सरकारची पाठराखण याप्रसंगी केली. सरकार अनेक निर्णय घेत असतात आणि ते मागेही घेतले जातात. त्यात काही चुकीचं नसल्याचं केंद्रीय कृषीमंत्र्यांनी म्हटल आहे.