జనవరి 2018 నెలలో ఏపీ ముఖ్యమంత్రి నారా చంద్రబాబు నాయుడు కర్నూలు ఓర్వకల్ ప్రాంతంలోని డాక్టర్ అబ్దుల్ హక్ ఉర్దూ విశ్వవిద్యాలయంలో డాక్టర్ అబ్దుల్ కలామ్ పేరు మీద నెలకొల్పే క్యాంపస్‌కి శంఖుస్థాపన చేస్తారని , ఆ విశ్వవిద్యాలయ ఉప కులపతి కె.ముజఫర్ అలీ షామిరి తెలిపారు. ఈ యూనివర్సిటీ నిర్మాణానికి 144 ఎకరాల స్థలం కేటాయించినట్లు సమాచారం. అలాగే 18.4 కోట్ల రూపాయలను తొలివిడతలో నిర్మాణానికి కేటాయించారు.
దాదాపు ఒక సంవత్సరంలో ఈ నిర్మాణ పనులు పూర్తి చేయనున్నట్లు అధికారులు చెబుతున్నారు. అలాగే ఈ ప్రాజెక్టు పూర్తి అవ్వడానికి దాదాపు 100 కోట్లు ఖర్చు అవుతుందని అధికారిక అంచనా. ఇప్పటికే ఈ విషయమై యూజీసీకి ఉత్తర ప్రత్యుత్తరాల ద్వారా సమాచారం అందించింది ప్రభుత్వం. ప్రస్తుతం ఈ విశ్వవిద్యాలయంలో దాదాపు 176 మంది విద్యార్థులు చదువుతున్నారు. అందులో 90 శాతం మంది మహిళలే ఉన్నారు. బిఏ (ఉర్దూ), ఎంఏ (ఉర్దూ)తో పాటు ఉర్దూ మాధ్యమంగా బ్యాచిలర్ డిగ్రీ కోర్సులను కూడా ఈ విశ్వవిద్యాలయం అందిస్తోంది. గత సంవత్సరమే ఈ యూనివర్సిటిని ఏపీ ప్రభుత్వం కర్నూలులో నెలకొల్పింది.
