EPF withdrawal: కరోనా క్రైసిస్‌లో ఆర్థిక ఇబ్బందులు తీరాలంటే ఇలా చేయండి

కరోనా కారణంగా (Coronavirus) ఎదురయ్యే ఆర్థిక ఇబ్బందులను (Financial crisis) అధిగమించేందుకు కేంద్రం సైతం ఎంప్లాయిస్ ప్రావిడెంట్ ఫండ్ డబ్బులను విత్‌డ్రా (Withdraw EPF money) చేసుకోవడం సులభతరం చేసింది. ఈమేరకు గత వారమే కేంద్ర కార్మిక శాఖ ఓ నోటిఫికేషన్‌ను సైతం విడుదల చేసింది.

కరోనా వైరస్ (Coronavirus) కారణంగా యావత్ ప్రపంచం ఆర్థికంగా ఒడిదుడుకులకు లోనవుతోంది. ప్రభుత్వాలే కాదు.. ప్రజలు సైతం ఆర్థిక ఇబ్బందులతో (Financial crisis) సతమతమవుతున్నారు. ప్రజా సంక్షేమం కోసం ప్రభుత్వాలు ఎన్ని పథకాలు ప్రవేశపెట్టినా, ఎన్ని చర్యలు తీసుకున్నా.. ప్రజలకు కరోనాతో వచ్చి ఆర్థిక కష్టాలు మాత్రం వీడటం లేదు. ఇలాంటప్పుడు ఇప్పటివరకు దాచుకున్న పొదుపు డబ్బుల్లోంచి కొన్ని ఖర్చు చేయకతప్పదు. అంతేకాదు.. పొదుపు చేసుకున్న డబ్బులు అవసరాలకు సరిపోవు అని అనిపిస్తే.. ఎంప్లాయి ప్రావిడెంట్ ఫండ్ డబ్బులు ఉపసంహరించుకునే (Withdraw EPF money) వెసులుబాటు ఉంది. ఎందుకంటే.. కొన్నిసార్లు పొదుపు చేసుకున్న డబ్బులపై వచ్చే వడ్డీ కంటే.. చేసిన అప్పులు, క్రెడిట్ కార్డులకు పేమెంట్ చేయకపోవడం వల్ల పడే వడ్డీలే అధికంగా ఉంటాయి. అందుకే ప్రావిడెంట్ ఫండ్‌ డబ్బులతో ఆ కష్టాలను గట్టెంకించుకోవచ్చు అనేది ఆర్థిక నిపుణుల అభిప్రాయం.

కరోనా కారణంగా ఎదురయ్యే ఆర్థిక ఇబ్బందులను అధిగమించేందుకు కేంద్రం సైతం ఎంప్లాయిస్ ప్రావిడెంట్ ఫండ్ డబ్బులను విత్‌డ్రా చేసుకోవడం సులభతరం చేసింది. ఈమేరకు గత వారమే కేంద్ర కార్మిక శాఖ ఓ నోటిఫికేషన్‌ను సైతం విడుదల చేసింది. ఈపీఎఫ్ సబ్‌స్క్రైబర్స్ ఈపీఎఫ్ ఖాతాలో పొదుపు చేసుకున్న మొత్తంలోంచి 75 శాతం వరకు నగదు లేదా మూడు నెలలకు సమానమైన బేసిక్ పే, డియర్‌నెస్ అలవెన్స్ డబ్బుల్లో ఏది తక్కువైతే.. ఆ మొత్తాన్ని ఉపసంహరించుకోవచ్చని కార్మిక శాఖ స్పష్టంచేసింది.