Volunteer Seva Quota Released In Tirumala: తిరుమల శ్రీవారిని దర్శించుకోవాలని నిత్యం తపించిపోయే భక్తులకు భారీ శుభవార్త. శ్రీవారి సేవ చేసుకోవడానికి అద్భుతమైన మార్గం. శ్రీవారి సేవ కోటా ఈరోజు విడుదల చేశారు. ఈనెల 18న ఏప్రిల్ కోటకు సంబంధించిన తిరుమల శ్రీ వేంకటేశ్వరుని ఆన్లైన్ టికెట్లు విడుదల చేసిన సంగతి తెలిసిందే. అయితే, తాజాగా 27న శ్రీవారి సేవ- ఉదయం 11 గంటలకు, నవనీత సేవ- మ‌ధ్యాహ్నం 12 గంటలకు, పరకామణి సేవ మ‌ధ్యాహ్నం 1 గంట‌కు ఆన్‌లైన్‌లో విడుదల చేయనున్నారు.
ఈ నెల 18న విడుదల చేసింది ఆర్జిత టోకెన్లు, సహస్రదీపాలంకరణ, కల్యాణోత్సవం, ఉంజాల్‌ సేవ కల్పిస్తారు. ఇక జనవరి 24 తేదీన రూ.300 ప్రత్యేక దర్శనం టికెట్లు విడుదల చేశారు. అయితే జనవరి 27 నేటి నుంచి తిరుమల శ్రీవారి వాలంటరీ సేవల కోటా విడుదల చేశారు. ఈ నేపథ్యంలో జనరల్ శ్రీవారి సేవ, నవనీత సేవా, పరకామణి సేవ చేసుకునే భాగ్యం కలుగుతుంది. టీటీడీ అధికారిక వెబ్సైట్లో నేరుగా అప్లై చేసుకోవచ్చు.
తిరుమల తిరుపతి దేవస్థానం 2000 సంవత్సరంలో 'శ్రీవారి సేవ' వాలంటరీ సర్వీస్‌ను ప్రారంభించింది. శ్రీవారిని సేవించడానికి ఇది సరైన అవకాశం. ఇందులో అన్నప్రసాదనం, మెడికల్, లడ్డూ ప్రసాదం పంపిణీ సేవ, క్యూ కాంప్లెక్స్ గదిలో ఆహార పంపిణీ సేవ, వెంగమాంబ అన్న ప్రసాదం సేవ చేసే భాగ్యం కలుగుతుంది.
ఇక ఈ శ్రీవారి సేవలో మన దేశవ్యాప్తంగా 10 రాష్ట్రాలకు చెందిన భక్తులు ఉచితంగా స్వచ్ఛంద సేవలో పాల్గొనే అదృష్టం కలుగుతుంది. ఎందుకంటే ప్రపంచ ప్రఖ్యాతి గాంచిన టిటిడిలో ఈ ఆలయ కార్యక్రమాలకు రోజు 5000 మంది వరకు సిబ్బంది అవసరం.
ఈ సేవలో జాతీయ బ్యాంకు ఉద్యోగులు, ప్రభుత్వ ప్రైవేటు రంగ ఉద్యోగులు, శ్రీవారి హుండీ కానుకలు లెక్కించడానికి కూడా అనుమతి ఇస్తారు. ఈ సేవలో పాల్గొన్న వారికి ఉచిత ఆహారం, వసతి, స్వామివారి దర్శనం కల్పిస్తారు. ఇంకా రెండు లడ్డులు కూడా బహుమతిగా ఇస్తారు. పురుష సేవకులకు ఆర్టీసీ బస్ డిపో వద్ద, మహిళా సేవకులకు PAC III కాంప్లెక్స్ వద్ద వసతి కల్పిస్తారు.
https://srivariseva.tirumala.org ఆసక్తి ఉన్న భక్తులు అప్లై చేసుకోవచ్చు. ఈ సేవలో పాల్గొనడానికి భక్తులకు గరిష్టంగా ఏడు రోజులు అనుమతిస్తారు. ఇక లడ్డు పరకామణి సేవకు మాత్రం మూడేసి రోజులు మొత్తం ఆరు రోజులు అనుమతిస్తారు.
ఇక తిరుమలలో భక్తుల రద్దీ తగ్గుముఖం పట్టింది. కేవలం రెండు కంపార్ట్మెంట్లలోనే భక్తులు వేచి ఉంటున్నారు. టోకెన్లు లేని భక్తులకు సర్వదర్శనానికి ఆరు గంటల సమయం పట్టగా.. ఇక నిన్న మొత్తంగా 74,000 మంది పైగా శ్రీవారిని దర్శించుకున్నారు. 3.67 కోట్లు హుండీ ఆదాయం సమకూరినట్లు టిటిడి అధికారులు తెలిపారు.
