'आता तरी देवा मला पावशील का?', पालकमंत्रीपदासाठी गोगावलेंचं तुळजाभवानीला साकडं

रायगडच्या पालकमंत्रीपदाचं भिजत घोंगडं अद्यापही कायम आहे. रायगडच्या पालकमंत्रीपदावरून शिवसेना आणि राष्ट्रवादी काँग्रेसमध्ये रस्सीखेच सुरू आहे. आता तर मंत्री भरत गोगावले यांनी पालकमंत्रीपदासाठी तुळजाभवानीला साकडं घातलंय. रायगडच्या पालकमंत्रीपदासाठी मंत्री भरत गोगावले इच्छूक आहेत ही गोष्ट आता लपून राहिलेली नाहीय.

रायगड आणि नाशिकचं पालकमंत्रीपदाला स्थगिती देण्याची नामुष्की महायुती सरकारवर आली. त्यानंतर रायगडचं पालकत्व घेण्यासाठी भरत गोगावले सरसावले आहेत. आता तर थेट तुळजाभवानीचं दर्शन घेऊन पालकमंत्रीपदासाठी  साकडं घालणार असल्याचं मंत्री भरत गोगावले यांनी सांगितलं. मुख्यमंत्री देवेंद्र फडणवीस आणि उपमुख्यमंत्री अजित पवार आणि उपमुख्यमंत्री एकनाथ शिंदे याबाबत निर्णय घेतील असंही यावेळी भरत गोगावले यांनी सांगितलं आहे.

पालकमंत्रीपदाचा वाद सुरु असतानाच मंगळवारी राज्याचे अर्थमंत्री अजित पवार यांनी मंत्रालयातील दालनात ऑनलाईन पद्धतीने रायगड जिल्ह्याच्या वार्षिक आराखड्याचा आढावा घेतला. यामध्ये बैठकीला फक्त राष्ट्रवादी काँग्रेसच्या मंत्री आदिती तटकरे उपस्थित होत्या. 

रायगडच्या पालकत्वासाठी मंत्री भरत गोगावले यांची प्रार्थना

आधी मंत्रीमंडळाचा विस्तार रखडला होता. त्यानंतर पालकमंत्रीपदाच्या वाटपावरून महायुतीत धुसफूस सुरू झाली. मोठ्या संघर्षानंतर पालकमंत्रीपदाचं वाटप करण्यात आलं. मात्र त्यानंतर रायगड आणि नाशिकच्या पालकमंत्रीपदाला स्थगिती देण्यात आली. रायगडच्या पालकमंत्रीपदावर राष्ट्रवादी काँग्रेससह शिवसेनेचा दावा आहे. रायगडच्या पालकमंत्रीपदासाठी भरत गोगावले आणि अदिती तटकरे इच्छूक आहेत. हा तिढा सोडवण्याचं मोठं आव्हान महायुती सरकारसमोर आता उभे राहिले आहे.

आधी मंत्रिपदासाठी देव पाण्यात बुडवून ठेवलेल्या भरत गोगावले यांच्या गळ्यात मंत्रीपदाची माळ पडली आणि त्यांनी सुटकेचा निश्वास सोडला. मंत्रीपदाचा कोट घातलेल्या भरत गोगावले यांना आता रायगडचं पालकमंत्रीपद खुणावू लागलंय. त्यामुळे रायगडचं पालकत्व मिळवण्यात भरत गोगावले यांना यश येणार का, हा खरा प्रश्न आहे.