'या' अभिनेत्रीचे नाव ऐकताच शशि कपूर यांनी दिला होता चित्रपटाला नकार

Shashi Kapoor : बॉलिवूडमध्ये अनेक जुन्या अभिनेत्री आहेत, ज्यांनी आपल्या सौंदर्याने प्रेक्षकांवर एक वेगळीच छाप पाडली होती. यापैकीच एक अभिनेत्री म्हणजे मुमताज. या अभिनेत्रीचे नाव खूप लोकांना माहिती नसेल. मात्र, मुमताजबद्दल बोलायचे म्हटले तर ती तिच्या अभिनयासोबतच सौंदर्यासाठीही ओळखली जात होती. तिच्या सौंदर्याने अनेक मोठ-मोठ्या कलाकारांना देखील वेड लावले होते. परंतु, मुमताजसोबत काम करण्यास नकार देणारा अभिनेताही आहे. हा अभिनेता दुसरा कोणी नसून शशि कपूर होता.

अभिनेत्री मुमताजने 1958 मध्ये इंडस्ट्रीमध्ये बालकलाकार म्हणून प्रवेश केला होता. तिच्या पहिल्या चित्रपटाचे नाव 'सोने की चिड़िया' होते. जेव्हा तिने अभिनेत्री म्हणून अभिनयाला सुरुवात केली तेव्हा तिने कोणतेही विशेष चित्रपट केले नाहीत. परंतु, 1970 मध्ये प्रदर्शित झालेल्या'सच्चा झूठा'चित्रपटानंतर ती प्रेक्षकांच्या नजरेत आली. या चित्रपटात तिच्यासोबत राजेश खन्ना हे मुख्य अभिनेता होते. प्रेक्षकांना ही जोडी खूप आवडली होती. या चित्रपटातील कलाकारांबद्दल बोलायचं म्हटलं तर या चित्रपटात राजेश खन्ना यांच्या जागी पहिली पसंती शशि कपूर यांना होती. 

चित्रपटाला शशि कपूर यांनी दिला होता नकार

परंतु, जेव्हा शशि कपूर यांना हा चित्रपट ऑफर करण्यात आला होता, तेव्हा त्यांनी अभिनेत्रीबद्दल माहिती घेतली होती. त्यावेळी या चित्रपटात मुमताज यांची निवड करण्यात आली होती. मुमताज यांचे नाव ऐकताच शशि कपूर यांनी चित्रपटाला नकार दिला. या चित्रपटाचे नाव 'सच्चा झूठा'होते. त्यावेळी मुमताज यांच्यासोबत शशि कपूर यांनी चित्रपट करण्यास नकार दिला कारण, त्यावेळी मुमताज बी-ग्रेड स्टंट चित्रपट करत होत्या. त्यावेळी शशि कपूर यांचे चित्रपटसृष्टीमध्ये मोठे नाव होते. त्यानंतर हा चित्रपट राजेश खन्ना यांना ऑफर करण्यात आला. त्यांनी लगेच या चित्रपटाला होकार दिला. 

राजेश खन्ना यांना मिळाला होता सर्वोत्कृष्ट अभिनेत्याचा पुरस्कार

'सच्चा झूठा' हा चित्रपट मनमोहन देसाई यांच्या दिग्दर्शनाखाली बनवण्यात आला होता. हा चित्रपट बॉक्स ऑफिसवर हिट ठरला. इतकंच नाही तर हा चित्रपट त्या वर्षातील सर्वाधिक कमाई करणारा चित्रपट ठरला होता. या चित्रपटानंतर दोघांची जोडी देखील सुपरहिट ठरली. या चित्रपटासाठी राजेश खन्ना यांना सर्वोत्कृष्ट अभिनेत्याचा पुरस्कारही मिळाला होता.