कोरोनाबाधित रुग्णांवर Home Isolation App च्या माध्यमातून वॉच, या जिल्ह्यात सुविधा सुरु

मुंबई  : राज्यात कोरोनाचा प्रादुर्भाव मोठ्या प्रमाणात वाढत आहे. (Coronavirus in Maharashtra) तसेच आरोग्य यंत्रणेवरही ताण येत आहे. मुंबईसह पुण्यातही कोरोना रुग्णवाढीचा वेग जास्त आहे. त्यामुळे चिंता व्यक्त करण्यात येत आहे. पुण्यात रेमडेसिवर औषधाचा तुटवटा जाणवत आहे. तसेच रुग्णसंख्या मोठी असल्याने बेडही अपुरे पडत आहेत. गृह विलगिकरणात असलेल्या कोरोना बाधित रुग्णांच्या वापरासाठी व त्यांच्या आरोग्याच्या उपचारावर लक्ष ठेवण्यासाठी ‘होम आयसोलेशन ॲप’चा (Home Isolation App) उपयोग केला जाणार आहे.

पुणे महानगरपालिकेच्यावतीने कोविड-19 गृह विलगीकरण ॲप्लिकेशनचा (Home Isolation App) शुभारंभ उपमुख्यमंत्री अजित पवार (Ajit Pawar) यांच्या हस्ते विधानभवनातील कौन्सिल हॉलमध्ये झाला. यावेळी पुण्याचे महापौर मुरलीधर मोहोळ, पिंपरी चिंचवडच्या महापौर उषा उर्फ माई ढोरे, जिल्हा परिषदेच्या अध्यक्षा निर्मला पानसरे, खासदार श्रीरंग बारणे, खासदार डॉ.अमोल कोल्हे, माजी मंत्री तथा आमदार चंद्रकांत पाटील यांच्यासह जिल्ह्यातील आमदार, विभागीय आयुक्त सौरभ राव, पुणे महानगरपालिका आयुक्त विक्रमकुमार, पिंपरी चिंचवड महानगरपालिका आयुक्त राजेश पाटील, जिल्हाधिकारी डॉ. राजेश देशमुख, अतिरिक्त आयुक्त रुबल अग्रवाल यांच्यासह वरिष्ठ अधिकारी उपस्थित होते. ( Deputy Chief Minister Ajit Pawar launches Pune Municipal Corporation's 'Home Isolation App')

गृह विलगिकरणात असलेल्या कोरोना बाधित रुग्णांच्या वापरासाठी आणि त्यांच्या आरोग्याच्या उपचारावर लक्ष ठेवण्यासाठी पुणे महानगरपालिकेच्यावतीने हे ॲप विकसित करण्यात आले आहे. या ॲपचा निश्चित चांगला उपयोग होणार असून गृह विलगीकरणात असलेल्या रुग्णांच्या तब्येतीवर आरोग्य विभागाला लक्ष ठेवण्यासाठी याचा चांगला उपयोग होणार असल्याची प्रतिक्रिया उपमुख्यमंत्री अजित पवार यांनी यावेळी दिली.

ॲपची वैशिष्ट्ये :

- ताप, पल्स, ऑक्सिजन, खोकला, सर्दी, थकवा, रक्तदाब, मधुमेह इत्यादी गोष्टींचे मूल्यांकन घरी विलगीकरण केलेला रुग्ण स्वतः ॲपद्वारे साध्या क्लिकद्वारे करू शकतो.

- स्वतः च्या मदतीसाठी रुग्ण आपत्कालीन सतर्कता संदेश पाठवू शकतो, जो संदेश प्रभागनिहाय हेल्पलाईन क्रमांकावर पोहोचेल. तसेच रुग्णाला विलगीकरण वैद्यकीय किट मागवता येईल.

- या ॲपच्या प्रभागनिहाय डॅशबोर्डवर तसेच मुख्यालयातील वॉररूममध्ये एकत्रित डॅशबोर्डवर ऑक्सिजन, ताप इत्यादी सारख्या रुग्णाच्या लक्षणांवर व आरोग्याच्या स्थितीवर निरीक्षण करण्याची सुविधा उपलब्ध आहे.

- ज्या रुग्णांकडे स्मार्टफोन नाही, त्यांचे आप्तजन आरोग्य विषयक माहिती पाठवू शकतात.