'चित्रा वाघ पुरुषांना ब्लॅकमेल करतात', विद्या चव्हाण यांचा गंभीर आरोप

मुंबई : राज्य महिला आयोगाच्या (state women commission) अध्यक्षपदी राष्ट्रवादी काँग्रेसच्या महिला प्रदेशाध्यक्ष रुपाली चाकणकर (Rupali chakankar) यांची नियुक्ती निश्चित मानली जात आहे. पण निवड होण्यापूर्वीच अध्यक्षपदावरुन राष्ट्रवादी विरुद्ध भाजप महिला नेत्यांमध्ये नवीन वाद निर्माण झाला आहे. भाजप नेत्या चित्रा वाघ (chitra wagh) यांनी राणवाला मदत करणारी शूर्पणखा त्याठिकाणी बसवू नका असं ट्विट केलं. यानंतर राष्ट्रवादी काँग्रेसच्या नेत्या विद्या चव्हाण यांनी चित्रा वाघ (vidya chavan) यांच्यावर गंभीर आरोप केले आहेत.

विद्या चव्हाण यांचे गंभीर आरोप

चित्रा वाघ यांची अवस्था म्हणजे कोल्ह्याला द्राक्ष आंबट अशी झालेली आहे. जोरजोरात उड्या मारायच्या आणि द्राक्षाच्या घडापर्यंत उडी जात असतानाच द्राक्ष आंबट आहे असं म्हणायचं असा टोला विद्या चव्हाण यांनी लगावला आहे. राष्ट्रवादी काँग्रेसमध्ये आज राहिल्या असत्या तर त्यांना आज काय काय पदं मिळाली असती याची त्यांना आठवण झाली की त्यांना वाईट वाटतं. आणि म्हणून कोणाला तरी शूर्पणका म्हणायचं. आता शूर्पणखा काय वाईट होती का? ती पण एक महिला होती. त्यामुळे एका महिलेने दुसऱ्या महिलेला असं बोलणं बरोबर नाही, असं उत्तर विद्या चव्हाण यांनी दिलं आहे.

त्यांच्या आतापर्यंतच्या प्रेस कॉन्फरन्स बघितल्या तर त्या सर्रास ब्लॅकमेलिंगचा प्रकार सुरु आहे. आणि हे तंत्र त्यांना चांगलंच अवगत झालं आहे. भाजपाच्या एका आमदाराला ब्लॅगमेलिंग करण्याच प्रयत्न त्यांनी केला होता. त्या जेव्हा महिला आयोगाच्या सदस्या होत्या आणि त्यांना त्यातलं कळायला लागल्यानंतर त्यांनी हा प्रकार सुरु केला असा आरोप विद्या चव्हाण यांनी केला आहे.

भजापाला आज बरं वाटतं कारण त्या दुसऱ्यांवर आरोप करतायत. पण भाजपाच्या आमदारांवर पण त्यांनी अशा प्रकारचे आरोप केले. याला बघून घेते, त्याला बघून घेते, अशा प्रकारच्या धमक्या त्या देतात. हे असे प्रकार थांबले पाहिजेत असं विद्या चव्हाण यांनी म्हटलं आहे. चित्रा वाघ यांनी मर्यादा पाळल्या पाहिजेत असा सल्लाही विद्या चव्हाण यांनी दिला आहे.

चित्रा वाघ  यांचं आव्हान

विद्या चव्हाण यांनी केलेल्या आरोपांना चित्रा वाघ यांनी उत्तर दिलं आहे. विद्या चव्हाण यांनी सिद्ध करावं की कुठल्या मुलीला मी घरी ठेऊन कोणत्या आमदाराकडे खंडणी मागितली होती. विद्या चव्हाण यांनी सिद्ध करावं, त्याच क्षणी मी राजकारणातून बाहेर पडेन असं आव्हान चित्रा वाघ यांनी दिलं आहे. 

चित्रा वाघ यांचं काय होतं ट्विट

रुपाली चाकणकर यांच्या निवडीबाबत राजकीय वर्तुळात चर्चा सुरू झाल्या असताना भाजपा नेत्या चित्रा वाघ यांनी चाकणकर यांचे नाव न घेता अप्रत्यक्ष टीका केली होती. महिलांचे शील भ्रष्ट करणारे रावण राजरोस फिरताहेत पण राज्य महिला आयोगाला अद्याप अध्यक्ष नाही हे लाजिरवाणं आहे. अध्यक्ष लवकर नेमावा पण महिलांच्या क्षेत्रात काम करणारी कोणी अनुभवी मिळत नसेल तर किमान रावणाला मदत करणारी 'शुर्पणखा' बसवू नका. अन्यथा प्रत्येकवेळी सरकारचंच नाक कापलं जाईल, असं ट्विट चित्रा वाघ यांनी केलं होतं. 

पण माध्यमांनी चुकीचा अर्थ घेत रुपाली चाकणकरांना उद्देशून बातम्या चालवल्या, मी कोणाचंही नाव घेतलं नव्हतं असा घुमजाव नंतर चित्रा वाघ यांनी केला.