ஆளுநரை சந்தித்தனர் தமிழக முதல்வர், துணை முதல்வர்

ஆளுநர் பன்வரிலால் புரோஹித்தை தமிழக முதல்வர் எடப்பாடி பழனிசாமி இன்று மாலை சந்திக்கிறார்.

19:43 04-04-2018

ராஜ்பவனில் ஆளுநரை சந்தித்து பேசி வருகிறார் தமிழக முதல்வர் பழனிச்சாமி. அவருடன் துணை முதல்வர் மற்றும் அமைச்சர் ஜெயக்குமார் உடன் இருகின்றனர்.

---

கடந்த மாதம் 16-ம் தேதி காவிரி நதி நீர் பங்கீடு தொடர்பான இறுதி தீர்ப்பை வழங்கிய உச்சநீதிமன்றம், 6 வார காலத்திற்குள்ளாக மத்திய அரசு காவிரி மேலாண்மை வாரியம் அமைக்கப்பட வேண்டு என ஆணையிட்டது. ஆனால், காவிரி மேலாண்மை வாரியம் அமைப்பதற்கு சுப்ரீம் கோர்ட் விதித்துள்ள காலக்கெடு கடந்த மார்ச் 29-ம் தேதி முடிவடைந்தது. 

காவிரி மேலாண்மை வாரியம் அமைக்காத மத்திய அரசைக் கண்டித்து தமிழகம் முழுவதும் போராட்டம் வெடித்தது. அனைத்து கட்சிகளும் போராட்டத்தில் ஈடுபட்டு உள்ளனர். ஆளும் கட்சியான அதிமுகவும் நேற்று 32 மாவட்ட தலைநகரங்களில் உண்ணாவிரத போராட்டத்தில் ஈடுபட்டது. 

நாளை தமிழகம் தழுவிய பொது வேலை நிறுத்தம் போராட்டம் நடத்தபோவதா திமுக தலைமையில் நடைபெற்ற அனைத்து கட்சி கூட்டத்திற்க்கு பிறகு அறிவிக்கபட்டு உள்ளது.

இந்நிலையில்,  தமிழகத்தில் சட்டம் ஒழுங்கு பிரச்னை குறித்தும், காவிரி மேலாண்மை வாரியம் அமைப்பது குறித்தும் முதல்வர் மற்றும் ஆளுநர் பேச உள்ளதாக தகவல் வெளியாகியுள்ளது. சுமார் 7 மணி அளவில் கிண்டியில் உள்ள ராஜ்பவனில் ஆளுநரை சந்திக்கிறார் தமிழக முதல்வர் பழனிச்சாமி.

தமிழகத்தில் ஏற்பட்டுள்ள பதற்றமான சூழ்நிலையில் தமிழக ஆளுநர் மற்றும் தமிழக முதல்வர் சந்திக்கவிருப்பது வழக்கமான சந்திப்பாக பார்க்காமல் முக்கியமானதாக பார்க்கப்படுகிறது என்பது குறிப்பிடத்தக்கது.