కొందరు బాధ్యత లేని వ్యక్తుల వల్ల... ఓ లారీ డ్రైవర్ నిర్వాకం వల్ల... ఓ కుటుంబం పెను విషాదాన్ని మూటగట్టుకుంది. ముక్కుపచ్చలారని తొమ్మిదేళ్ళ చిన్నారి భూమిక ఉప్పల్ చిలుకానగర్‌ ప్రాంతంలో మంగళవారం ఉదయం నడిరోడ్డుపై అసువులు బాసిన వైనం అక్కడున్న వారినందరినీ కన్నీళ్లు పెట్టించింది. పోలీసుల కథనం ప్రకారం.. చిల్కానగర్‌లో నివసిస్తున్న ఎస్.మధుకర్ అనే లారీ డ్రైవర్ మంగళవారం ఉదయం తన లారీని అతి వేగంగా నడుపుతూ ఆదర్శనగర్ పెట్రోల్ బంక్ సమీపంలో హోండా ఆక్టివాను ఢీకొట్టిన విషయం తెలిసిందే.
ఈ ఘటనలో తల్లి శోభ, పెద్ద కుమార్తె రీతిక బతకగా.. రెండో కూతురు భూమిక అలియాస్ పింకి (8) మరణించింది. అయితే రోడ్డు ప్రమాదానికి కారణం గుంతలే అని సోషల్ మీడియాలో ప్రచారం జరిగినందుకు స్పందించిన ఎమ్మెల్యే ప్రభాకర్, డిప్యూటీ కమిషనర్ యాదగిరిరావు, ఇఇ రాజయ్య, ట్రాఫిక్ ఇన్‌స్పెక్టర్ జంగయ్య సంఘటన స్థలాన్ని పరిశీలించారు. గుంతల వల్ల ప్రమాదం జరగలేదని తేల్చారు. అయితే ఈ మధ్యకాలంలో రోడ్డు పనులు సగం పూర్తిచేసి మధ్యలోనే వదిలేయడం వల్ల గుంతలు ఏర్పడుతున్నాయని.. అవే ప్రమాదాలకు దారితీస్తున్నాయని పలువురు స్థానికులు ఆవేదన వ్యక్తం చేస్తున్నారు. ఈ క్రమంలో ఆ ప్రమాదంలో చనిపోయిన బాలిక భూమిక పేరిట ఓ లేఖ కేటీఆర్‌కు సందేశం పంపుతూ సోషల్ మీడియాలో వైరల్ అయ్యింది. అదేంటో ఇక్కడ చదవండి.
డియర్ కేటిఆర్ అంకుల్,
నా పేరు భూమిక. నా వయసు 8 ఏళ్ళు. ఉప్పల్ లో ఉంటాము. జాన్సన్ అండ్ జాన్సన్ గ్రామర్ స్కూల్, నాచారం లో సెకండ్ క్లాస్ చదువుతున్నాను. ఈ రోజు పొద్దున్నే నేను మా అక్క అమ్మతో కలిసి స్కూటీ మీద స్కూల్ కి వెళుతున్నాము. రోడ్డు మీద పెద్ద గుంత. అమ్మ బండి స్లో చేసింది. మా వెనక వస్తున్న లారీ అంకుల్ మా బండిని లారీతో గుద్దేసాడు. అంతే అమ్మ, నేను, అక్క కింద పడిపోయాం. నా తల బలంగా నేలకి గుద్దుకుంది. రక్తం కారిపోతోంది. అమ్మకి కూడా దెబ్బలు తగిలాయి, స్పృహ కోల్పోయింది.
అక్కడ ఉన్న ఓ అంకుల్ నన్ను తన చేతుల్లో ఎత్తుకుని ఆసుపత్రికి తీసుకెళ్తున్నాడు, నా తల నుంచి రక్తం కారిపోతూ ఉంది. ఐదు నిమిషాల్లో ఆసుపత్రికి చేరాము, డాక్టర్లు నన్ను చూసారు. నేను చనిపోయానట . అక్కడ నుంచి నన్ను గాంధీ ఆసుపత్రి మార్చురీకి తీసుకెళ్ళిపోయారు. ఇంకొక్క అయిదు నిమిషాలు ఉంటే రోల్ నంబర్ 28 అంటే హాజరు పలకాల్సిన నేను మార్చురీ లో 28 నంబర్ బాక్సులో శవంగా మిగిలాను అంకుల్.
ఇవాంకా వస్తోందని చాలా చోట్ల రోడ్లు బాగు చేసారట. మా కాలనీకి కూడా ఇవాంకా వచ్చి ఉంటె నేను బ్రతికేదాన్ని కదా అంకుల్. ప్రభుత్వాన్ని మేమేమైనా వజ్ర వైడూర్యాలు అడుగుతున్నామా అంకుల్. గుంతలు లేని రోడ్లే కదా అడుగుతున్నాం. ఎన్ని నెలల నుంచి ఈ రోడ్లు ఇంత అధ్వాన్నంగా ఉన్నాయో తెలుసా అంకుల్. మీరు, కెసిఆర్ అంకుల్ రోడ్లు బాగుచేయమని అధికారులకి చెప్పారని చాలా సార్లు పత్రికల్లో వచ్చింది. అయినా రోడ్లు బాగు కాలేదు. రోడ్ల మీద గుంతలు లేకుండా చేయడం ఏమైనా రాకెట్ సైన్సా అంకుల్. అదే మంటే అధికారులు బీటీ కి నీటికి పడదు అని సాకులు చెప్పి మిమ్మల్ని తప్పుదారి పట్టిస్తున్నారు. దేశమంతా వర్షాలు పడడం లేదా అక్కడ బీటీ రోడ్లు లేవా?
అక్కడ రోడ్లు ఇంత అధ్వాన్నంగా లేవు కదా అంకుల్. అయినా మన అసలు రోడ్లు వేసేటప్పుడు క్వాలిటీ ఉంటె కదా అంకుల్, కనీసం పదేళ్ళు ఉండాల్సిన రోడ్లు పది నెలలు కూడా ఉండడం లేదు. ఇంత నాసిరకంగా రోడ్లు వేసినందుకు ఒక్క ఆఫీసర్ మీద అయినా, ఒక్క కాంట్రాక్టర్ మీద అయిన చర్య తీసుకున్నారా? అధికారులకి మీరంటే భయం ఉంటె కదా అంకుల్ సరిగ్గా పనిచేయడానికి. ఈ ఆఫీసర్లకి, కాంట్రాక్టర్లకి, నాయకులకి కూడా పిల్లలు ఉంటారు కదా. రేపు వాళ్ళ పరిస్థితి అయినా ఇంతే కదా. ఎందుకు ఇంత చిన్న విషయం అర్థం కాదు. మాబోటి సామాన్యుల ప్రాణాలు అంటే అంత లోకువా అంకుల్. నేనే కాదు అంకుల్ ఇంకెంతో మంది నా లాగా యాక్సిడెంట్ లలో చనిపోయినవారి శవాలు ఇక్కడ కుప్పలుగా ఉన్నాయి.
అంకుల్ నా చావుతో నైనా మన హైదరాబాద్ రోడ్లు బాగుపడాలి. మీరు చాలా సమర్థులు అని మీకు చాలా అవార్డులు వస్తున్నాయి. మీరు తలచుకుంటే ఈ రోడ్లు బాగుపడతాయి. ఒక వారం కేవలం రోడ్ల సమస్య మీదే మీరు పనిచేయండి. పని చేయని అధికారులని పీకి పారెయ్యండి. కాంట్రాక్టర్లు తప్పు చేస్తే శిక్ష వేయండి. ఏమైనా చేయండి. రోడ్లు మాత్రం బాగు చేయండి అంకుల్. మా అక్క, అమ్మ, నా క్లాస్ మేట్స్, నా లాంటి మరెంతో మంది పిల్లలు, పెద్దల ప్రాణాలు, ఆరోగ్యం కాపాడండి. చివరిగా, నా తోటి పిల్లలకి నా విజ్ఞప్తి, బండి నడిపేవారే కాదు, వెనక కూర్చున్న వాళ్ళు కూడా హెల్మెట్ పెట్టుకోండి. కేటిఆర్ అంకుల్, మీరు మాత్రం మరో ప్రాణం బలికాకముందే రోడ్లు బాగుచేయించండి.
ఇట్లు,
ఎప్పటికీ మిమ్మల్ని చూడలేని..
భూమిక
