पुणे येथील झोपडपट्टी, जास्त घरांची गर्दी असलेल्या भागांवर लक्ष केंद्रीत करा - केंद्रीय पथक

संग्रहित छाया

पुणे : केंद्रीय पथकाकडून कोरोना प्रतिबंध उपायजोजनांचा आढावा घेण्यात आला. पुण्यात मोठ्या प्रमाणात कोरोना विषाणूचा प्रादुर्भाव होत आहे. याआधीही केंद्रीय पथक महाराष्ट्राच्या दौऱ्यावर आले होते. त्यावेळी पुण्यालाही भेट दिली होती. त्यावेळी या पथकाकाडून कोरोनाबाबत घ्यावयाच्या काळजीबाबत निर्देशही दिले होते. दरम्यान, केंद्रीय पथकाकडून उपाययोजनांचा आढावा घेताना मृत्यूदर कमी करण्यावर लक्ष केंद्रीत करण्याचे निर्देश दिले आहेत.

कोरोना विषाणूचा संसर्ग रोखण्यासाठी पुणे जिल्हा प्रशासनासह सर्वच यंत्रणा समन्वयाने काम करत असल्याचे समाधान व्यक्त केले. तसेच प्रतिबंधित क्षेत्रामधील निर्बंधांची कडक अंमलबजावणी केली जावी, असे स्पष्ट निर्देश केंद्रीय पथकाचे प्रमुख केंद्रीय गृहनिर्माण मंत्रालयाचे संयुक्त सचिव कुणाल कुमार यांनी दिलेत. कोरोना प्रतिबंधासाठी  दाट लोकवस्तीच्या क्षेत्रात स्वयंसेवकांची मदत घेण्याचेही त्यांनी सांगितले.

पुणे शहर आणि जिल्ह्यातील कोरोना विषाणूच्या पार्श्वभूमीवर आढावा घेण्यासाठी केंद्रीय स्तरावरील पथक पुणे जिल्ह्यात काल सकाळीच दाखल झाले आहे. या केंद्रीय पथकाने सोमवारी पुण्यातील प्रतिबंधित क्षेत्र, हॉस्पिटल तसेच पुणे महानगरपालिका येथे भेट देऊन पाहाणी केली. तसेच विभागीय आयुक्त कार्यालयात कोविड-१९ची वाढती संख्या, साथरोग प्रतिबंधात्मक उपाययोजना व त्या अनुषंगाने भविष्यात करावयाचे नियोजन याचा आढावा घेतला. 

पुणे जिल्ह्यात कोरोना प्रतिबंधासाठी सुरू असलेल्या उपाययोजना समाधानकारक आहेत, झोपडपट्टीच्या अथवा जास्त घरांची गर्दी असलेल्या भागांवर विशेष लक्ष केंद्रीत करावे. ज्येष्ठ नागरिक तसेच इतर आजार असलेल्या व्यक्तींची तातडीने तपासणी होणे आवश्यक आहे. उच्च रक्तदाब तसेच रक्तातील साखरेचे प्रमाण योग्य आहे का, तसेच त्यांचा औषधोपचार व्यवस्थित सुरु आहे, याबाबतही कायम आढावा घेण्यात यावा, याकामी त्याच परिसरातील वॉर्डनिहाय स्वयंसेवकांची नेमणूक करावी, जेणेकरून या कामात गती  येईल व स्वयंसेवक त्याच भागातील असल्याने तातडीने उपाययोजना करणे सुलभ होईल असे सचिव कुणाल कुमार म्हणालेत.

पल्स ऑक्सीमीटरचा वापर करण्यात यावा, संस्थात्मक क्वारंटाईन वाढविण्याबरोबरच अधिक चाचण्या करण्यावर भर देण्यात यावा. तसेच कोविड आणि नॉन कोविड रुग्णालयांमध्ये रुग्ण तपासणी करण्यात यावी.  कोविड व्यतिरिक्त इतर रुग्णांना देखील उपचार मिळावेत यासाठी आवश्यक ते नियोजन करावे, अशा सूचना त्यांनी केल्या.

पुणे शहरात कोणत्या हॉस्पीटलमध्ये बेड उपलब्ध आहेत, याचे डॅशबोर्ड तयार करण्यात आले आहे, या डॅशबोर्डच्या माध्यमातून प्रत्येक नागरिकांना बेड उपलब्धतेची माहिती मिळणार आहे. बेड व्यवस्थापन यंत्रणा तसेच रुग्णवाहिका व्यवस्थापन यंत्रणा अत्यंत गतिमान करा असे सांगून पुणे जिल्ह्यातील एकूण रुग्णसंख्या, परिसरनिहाय रुग्ण, रुग्णांमध्ये असलेले विविध आजार,रुग्णांचे वर्गीकरण,कोरोनामुळे मृत्यू झालेले रुग्ण त्याची कारणे, प्रतिबंधित क्षेत्राचा तपशील, घरोघरी झालेले सर्व्हेक्षण, कोविड सेंटर, शासकीय तसेच खाजगी रुग्णालय स्थिती आदींचा आढावा घेण्यात आला. 

यावेळी त्यांच्यासमवेत एम्स नागपूर येथील डॉ. अरविंद कुशवाह, डॉ. सीतीकांता बॅनर्जी उपस्थित होते. तसेच बैठकीला विभागीय आयुक्त डॉ. दीपक म्हैसेकर, जिल्हाधिकारी नवल किशोर राम, पुणे मनपा आयुक्त शेखर गायकवाड, साखर आयुक्त सौरभ राव, पशुसंवर्धन आयुक्त सचिंद्र प्रताप सिंग, भूजल सर्व्हेक्षण संचालक कौस्तुभ दिवेगावकर, अतिरिक्त आयुक्त रुबल अग्रवाल, शांतनू गोयल, पिंपरी चिंचवड मनपाचे अतिरिक्त आयुक्त संतोष पाटील,  जिल्हा पोलीस अधीक्षक संदीप पाटील, जिल्हा परिषदेचे मुख्य कार्यकारी अधिकारी आयुष प्रसाद, आरोग्य विभागाचे निवृत्त महासंचालक डॉ. सुभाष साळुंखे आदींसह  विविध विभागांचे अधिकारी उपस्थित होते.