COVID-19 தொற்றுநோயால் ஒத்திவைக்கப்பட்ட 10-ஆம் வகுப்பு SSC (மேல்நிலைப் பள்ளி சான்றிதழ்) தேர்வுகளுக்கான அட்டவணையை ஆந்திர அரசு அறிவித்துள்ளது.
தற்போது வெளியாகியுள்ள அட்டவணையின் படி தேர்வுகள் ஜூலை 10 முதல் 15 வரை, காலை 9.30 மணி முதல் மதியம் 12.45 மணி வரை நடத்தப்படும் என தெரிவிக்கப்பட்டுள்ளது.
வழக்கமாக, SSC தேர்வுகள் 11 தாள்கள் கொண்டு நடத்தப்படும். ஆனால் தற்போது COVID-19 காரணமாக, தாள்களின் எண்ணிக்கை ஆறாகக் குறைக்கப்பட்டுள்ளது. முன்னதாக, மாணவர்கள் 5 மொழித் தாள்கள், 2 கணிதம், 2 அறிவியல் மற்றும் 2 சமூக ஆய்வுத் தாள்களை எழுத வேண்டியிருந்தது. ஆனால் இப்போது முதல் மொழி பாடம், இரண்டாம் மொழி, ஆங்கிலம், கணிதம், அறிவியல் மற்றும் சமூக அறிவியல் என 6 தேர்வுகளை மட்டுமே எழுத வேண்டும் என குறிப்பிடப்பட்டுள்ளது. மற்றும் ஒவ்வொரு தாளும் 100 மதிப்பெண்களுக்கு இருக்கும் எனவும் தெரிவிக்கப்பட்டுள்ளது.
ஓரியண்டல் SSC மற்றும் தொழிற்கல்வி SSC தேர்வுகள் ஜூலை 16 மற்றும் 17 ஆகிய தேதிகளில் நடைபெறும் என்று மாநில கல்வித்துறை அமைச்சர் ஆதிமுலாப்பு சுரேஷ் தெரிவித்துள்ளார். “COVID-19 ஐப் பார்க்கும்போது, மாணவர்கள் பல முறை வீட்டை விட்டு வெளியேறுவது, பாதுகாப்பானது அல்ல. இதன் காரணமாகவே அட்டவணை 11-லிருந்து ஆறு தாள்களாக சுருக்கப்பட்டுள்ளது. தேர்வு மையங்கள் மற்றும் மாதிரி வினாத்தாள்களின் விவரங்கள் விரைவில் வெளிப்படும்,” என்றும் அவர் மேலும் குறிப்பிட்டுள்ளார்.
மேலும், மாவட்ட ஆட்சியர்கள், மாவட்ட கல்வி அலுவலர்கள் மற்றும் கல்வித் துறையின் பிற அதிகாரிகள், கட்டுப்பாட்டு மையங்களுக்கு வெளியே கூடுதல் மையங்களை அடையாளம் காணுமாறு கேட்டுக் கொள்ளப்பட்டுள்ளதாகவும், இதனால் அமர்வுகள் ஏற்பாடுகளில் போதுமான உடல் ரீதியான தூரத்தோடு தேர்வுகள் நடத்தப்படலாம் என்றும் அவர் குறிப்பிட்டுள்ளார்.
தேர்வு மையங்கள், ஹால் டிக்கெட், போக்குவரத்து வசதிகள் போன்றவை குறித்த முக்கிய தகவல்கள் ஊடகங்கள் மற்றும் சமூக ஊடகங்கள் மூலம் வெளியிடப்படும் என்றும் அவர் தெரிவித்துள்ளார்.
10-ஆம் வகுப்புக்கான தேர்வுகள் முன்னதாக மார்ச் இறுதியில் நடத்த திட்டமிடப்பட்டிருந்தன. நாடு தழுவிய பூட்டுதல் அறிவிக்கப்பட்ட பின்னர், 6 முதல் 9 வகுப்புகளுக்கான தேர்வுகள் ரத்து செய்யப்படும் என்றும், அனைத்து மாணவர்களும் அடுத்த வகுப்புக்கு உயர்த்தப்படுவார்கள் என்றும் மாநில அரசு அறிவித்தது குறிப்பிடத்தக்கது.
