பட்ஜெட்டில் வந்த அறிவிப்புகள்! இனி இந்த பொருட்களை மிக குறைந்த விலையில் வாங்கலாம்!

Union Budget 2025: இன்று தாக்கல் செய்யப்பட்ட யூனியன் பட்ஜெட் மூலம் சில பொருட்களின் விலை உயர்ந்தும், சில பொருட்களின் விலை குறைந்தும் உள்ளது.

பிப்ரவரி 1ம் தேதியான் இன்று 2025-26 நிதியாண்டுக்கான மத்திய பட்ஜெட்டை நிதியமைச்சர் நிர்மலா சீதாராமன் தாக்கல் செய்தார். வருமான வரி சட்டங்களை மேம்படுத்துதல், பொருளாதாரத்தை மேம்படுத்துதல் மற்றும் வணிகச் சூழலை எளிதாக்குதல் ஆகியவற்றை இலக்காகக் கொண்டு இந்த பட்ஜெட் தாக்கல் செய்யப்பட்டு இருந்தது. மேலும் சில குறிப்பிடத்தக்க சீர்திருத்தங்களை பட்ஜெட் வலியுறுத்தியது. இந்த ஆண்டு பட்ஜெட்டில் புதிய கொள்கை நடவடிக்கைகளை பிரதிபலிக்கும் வகையில், பல்வேறு பொருட்களின் விலை குறைப்புகளை நிதியமைச்சர் நிர்மலா சீதாராமன் அறிவித்தார்.

உள்நாட்டு உற்பத்தி மற்றும் வேலை உருவாக்கத்தை ஆதரிக்கும் நடவடிக்கையாக கோபால்ட் பவுடர், லித்தியம்-அயன் பேட்டரிகள், ஈயம், துத்தநாகம் மற்றும் அத்தியாவசிய தாதுப்பொருட்களுக்கான சுங்க வரியில் முழுமையான விலக்கு அளிக்கப்படும் என்று பட்ஜெட்டில் தெரிவிக்கப்பட்டுள்ளது. மேலும் சுங்க வரி குறைப்பு உள்ளிட்டவற்றுடன், இறக்குமதி செய்யப்பட்ட உயிர்காக்கும் மருந்துகள், புற்றுநோய் மற்றும் பிற அரிய நாள்பட்ட நோய்களுக்கான சிகிச்சைகள், உயர்தர கார்கள் மற்றும் மோட்டார் சைக்கிள்கள் ஆகியவை இனி மிகவும் மலிவு விலையில் கிடைக்கும். இருப்பினும், முழுமையாக கட்டமைக்கப்பட்ட பேனல் டிஸ்ப்ளேக்கள் மற்றும் பின்னப்பட்ட துணிகள் போன்ற சில பொருட்களின் விலை அதிகரிக்கும்.

கூடுதலாக, எல்சிடி மற்றும் எல்இடி டிவிகளை தயாரிப்பதில் பயன்படுத்தப்படும் திறந்த செல் உதிரிபாகங்கள் மீதான சுங்க வரி 2.5 சதவீதமாக குறைக்கப்பட்டுள்ளது. "இந்த முயற்சியானது இந்தியாவில் உற்பத்திக்கான நிலையான விநியோகத்தை உறுதி செய்யும் மற்றும் நமது இளைஞர்களுக்கு அதிக வேலை வாய்ப்புகளை உருவாக்கும்" என்று நிர்மலா சீதாராமன் கூறினார்.

எந்த பொருட்களின் விலை குறையும்

• புற்றுநோய் மற்றும் நாள்பட்ட நோய்களுக்கான 36 உயிர்காக்கும் மருந்துகள் அடிப்படை சுங்க வரிகளில் இருந்து முழுமையாக விலக்கு அளிக்கப்பட்டுள்ளன.
• எல்இடி/எல்சிடி டிவிகளுக்கான பேனல் டிஸ்ப்ளேக்கள், டச் கிளாஸ் பேனல்கள் மற்றும் டச் சென்சார்களுக்கான திறந்த செல்கள் மீதான வரி 15%லிருந்து 5% ஆக குறைக்கப்பட்டுள்ளது.
• மின்சார வாகன (EV) பேட்டரிகள் தயாரிப்பதற்கான 35 புதிய பொருட்கள் மற்றும் மொபைல் போன் பேட்டரிகள் தயாரிப்பதற்கான 28 புதிய பொருட்களுக்கு வரி விலக்கு அளிக்கப்பட்டுள்ளது.
• உறைந்த மீன் பேஸ்ட் மீதான வரி 30% லிருந்து 5% ஆக குறைக்கப்பட்டுள்ளது. மீன் வளர்ப்பு தீவனம் தயாரிப்பதற்கான மீன் ஹைட்ரோலைசேட் மீதான வரி 15% லிருந்து 5% ஆக குறைக்கப்பட்டுள்ளது. மேலும் உணவு அல்லது பானத் தொழிலில் பயன்படுத்தப்படும் சுவைகள் மீதான வரி 100% லிருந்து 20% ஆக குறைக்கப்பட்டுள்ளது.
• அயன் பேட்டரிகள், ஈயம், துத்தநாகம், ஆண்டிமனி, பெரிலியம், பிஸ்மத், கோபால்ட், காட்மியம், மாலிப்டினம், ரீனியம், டான்டலம், டின், டங்ஸ்டன், சிர்கோனியம் மற்றும் காப்பர் ஸ்கிராப் ஆகியவற்றிற்கு சுங்க வரி குறைக்கப்பட்டுள்ளது.
• கோபால்ட் பவுடருக்கு சுங்க வரி ஐந்து சதவீதத்தில் இருந்து பூஜ்ஜியமாக குறைக்கப்பட்டது
• ஜவுளித் தொழிலில் பயன்படுத்தப்படும் ரேபியர் தறிகள் மற்றும் ஏர் ஜெட் தறிகள் மீதான சுங்க வரி 7.5 சதவீதத்தில் இருந்து பூஜ்ஜியமாக குறைக்கப்பட்டுள்ளது.
• கேமரா மாட்யூல்கள், இணைப்பிகள், வயர்டு ஹெட்செட்கள், மைக்ரோஃபோன்கள் மற்றும் ரிசீவர்கள், USB கேபிள்கள், சென்சார்கள் ஆகியவற்றின் மீதான சுங்க வரி 2.5 சதவீதத்தில் இருந்து பூஜ்ஜியமாக குறைக்கப்பட்டுள்ளது.
• ஏவுகணை வாகனங்கள் மற்றும் செயற்கைக்கோள்களை ஏவுவதற்கு பயன்படுத்தப்படும் பொருட்கள், அவற்றின் கூறுகள் மற்றும் செயற்கைக்கோள்களை தரையில் நிறுவுவதற்கான நுகர்பொருட்கள் உட்பட அனைத்திற்கும் சுங்க வரி பூஜ்ஜியமாக குறைக்கப்பட்டுள்ளது. கப்பல்கள் மற்றும் அவற்றின் பாகங்களுக்கான சுங்க வரி விலக்கு மேலும் 10 ஆண்டுகளுக்கு நீட்டிக்கப்பட்டுள்ளது.
• 1600 சிசிக்கு மிகாமல் இருக்கும் எஞ்சின் திறன் மீதான சுங்க வரி 40 சதவீதமாகவும், அரை-பிரிக்கப்பட்டவைகளுக்கு 20 சதவீதமாகவும், முழுமையாக பிரித்தெடுக்கப்பட்டவற்றின் மீது 10 சதவீதமாகவும் குறைக்கப்பட்டுள்ளது.

சார்பில்லாத சமரசமில்லாத செய்திகள் உங்கள் உள்ளங்கைகளில்! 

உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..

முகநூல் - @ZEETamilNews

ட்விட்டர் - @ZeeTamilNews

டெலிக்ராம் - https://t.me/ZeeTamilNews

வாட்ஸ்-அப் - https://whatsapp.com/channel/0029Va5XFvI90x2plF9cKY1r

அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!