32 लाखांची मदत... एकनाथ शिंदेंनी 'त्या' कुटुंबाला केलं कर्जमुक्त! स्वत:च्या वाढदिवशीच पाठवले पैसे

शिंदेंनी घेतला मोठा निर्णय (प्रातिनिधिक फोटो)

Eknath Shinde Help: उपमुख्यमंत्री एकनाथ शिंदेंच्या संवेदनशील नेतृत्वाचं दर्शन त्यांच्या एका कृतीमधून पुन्हा एकदा अधोरेखित झालं आहे. शिंदे यांनी जगद्गुरू संत तुकाराम महाराजांचे वंशज, दिवंगत कीर्तनकार शिरीष महाराज मोरे यांच्या कुटुंबीयांना आर्थिक मदत केली आहे. 9 फेब्रुवारी रोजी आपल्या वाढदिवसाच्या निमित्ताने त्यांनी मोरे कुटूंबियांना 32 लाख रुपयांची मदत देण्याचा निर्णय घेतला आहे. या मदतीमुळे मोरे कुटुंब कर्जमुक्त झालं आहे. 

आत्महत्येपूर्वी लिहिलेल्या चिठ्ठीत व्यक्त केलेली शेवटची इच्छा

देहूमधील प्रसिद्ध कीर्तनकार शिरीष महाराज मोरे यांनी गेल्या आठवड्यात आर्थिक विवंचनेला कंटाळून आत्महत्या केली होती. त्यांनी मृत्यूपूर्वी लिहून ठेवलेल्या चिठ्ठीत आपल्यावरील कर्जाच्या बोजाचा उल्लेख केला होता. आपल्यावर 32 लाखांचे कर्ज झाले असून ते फेडणे शक्य होत नसल्याने आपण टोकाचे पाऊल उचलत असल्याचे शिरीष महाराज मोरे यांनी आत्महत्येपूर्वी लिहिले चिठ्ठीत म्हटलं होते. आपल्या पश्चात आपल्या कुटुंबाला आर्थिक मदत करण्याची आर्त विनवणी शिरीष महाराज मोरे यांनी आपल्या मृत्यूपूर्वी लिहिलेल्या पत्रातून सर्व मित्रमंडळींना केली होती. शिरीष महाराज मोरे यांच्या सारख्या प्रसिद्ध कीर्तनकाराने असा टोकाचा निर्णय घेऊन अकाली जीवन संपवल्याने देहूमध्ये वारकरी संप्रदायाबरोबर धार्मिक आणि सामाजिक क्षेत्रातून मोठी हळहळ व्यक्त करण्यात आली.

या आमदाराने नेऊन दिली मदत

दिवंगत मोरे यांच्या जाण्याने त्यांच्या कुटूंबाला बसलेला धक्का पाहून उपमुख्यमंत्री शिंदेंनी मोरे कुटुंबियांना मदतीचा हात देण्याचा निर्णय घेतला. उपमुख्यमंत्री शिंदे यांनी त्यांना 32 लाख रुपयांची मदत देण्याचा निर्णय घेतला असून ही मदत घेऊन त्यांनी पुरंदरचे आमदार विजय शिवतारे यांना शिरीष महाराज मोरे यांच्या घरी पाठवलं. ही मदत तातडीने शिरीष महाराज मोरे यांच्या कुटुंबियांना सुपूर्द करण्यास उपमुख्यमंत्री शिंदेंनी शिवतारेंना सांगितलं होतं. रविवारी संध्याकाळी विजय शिवतारे यांनी स्वतः शिरीष महाराज मोरे यांच्या घरी जाऊन ही मदत सुपूर्त केली.

आत्महत्येपूर्वीच्या चिठ्ठीत

आपल्या पश्चात कुटुंबाला आर्थिक मदत करण्याची शिरीष महाराज मोरे यांच्या विनवणीला साद देत उपमुख्यमंत्री शिंदेंनी मोरे कुटुंबाला आर्थिक विवंचनेतून बाहेर काढण्यासाठी मदतीचा हात पुढे करत त्यांना कर्जमुक्त केलं आहे.