సంక్రాంతి పర్వదినం సందర్భంగా ఆంధ్రప్రదేశ్ ముఖ్యమంత్రి నారా చంద్రబాబునాయుడు తన కుటుంబ సభ్యులతో కలిసి తిరుపతి వెంకటేశ్వరస్వామిని దర్శించుకున్నారు. సీఎం సతీమణి భువనేశ్వరితో పాటు కుమారుడు లోకేష్, కోడలు బ్రాహ్మణి, మనవడు దేవాంశ్ కలియుగదైవాన్ని దర్శించుకొని మొక్కులు తీర్చుకున్నారు. ఈ క్రమంలో లోకేష్ కుమారుడు మరియు చంద్రబాబు మనవడు దేవాంశ్ దేవాలయంలో చేసిన సందడి పలువురిని ఆకట్టుకుంది. ముఖ్యంగా తన తాత చంద్రబాబు ఒడిలో కూర్చుని దేవుడిని ప్రార్థిస్తున్న సన్నివేశం చాలా ముద్దుగొలిపేలా ఉంది. ఆ ఫోటోలను లోకేష్ తన సామాజిక మాధ్యమాలైన ఫేస్బుక్, ట్విట్టర్‌లో పంచుకున్నారు. సంక్రాంతి వేడుకలు నిర్వహించేందుకు చంద్రబాబు, బాలకృష్ణ దంపతులు శనివారమే నారావారిపల్లెకు వెళ్లారు. ఆ తర్వాత ఆదివారం ఉదయమే జరిగిన భోగి వేడుకల్లో పాల్గొన్న అనంతరం తిరుపతికి వెళ్లి శ్రీ వేంకటేశ్వరస్వామిని దర్శించుకున్నారు.
