ఇండియాలో గ్రీక్ గాడ్‌గా పేరున్న బాలీవుడ్ స్టార్ హృతిక్ రోషన్ తన తర్వాతి ప్రాజెక్టు వివరాలు ప్రకటించాడు. సూపర్ 30 పేరిట తెరకెక్కనున్న కొత్త సినిమాలో హృతిక్ ఓ టీచర్ గెటప్ వేస్తున్నాడు. హృతిక్ రోషన్ తన మొత్తం కెరీర్‌లో టీచర్ పాత్ర పోషించడం ఇదే మొదటిసారి. బీహార్‌కి చెందిన ప్రముఖ మ్యాథమెటిషియన్ ఆనంద్ కుమార్ జీవితగాథ ఆధారంగా తెరకెక్కనున్న బయోపిక్ సినిమా ఇది. ఐఐటీ ప్రవేశం లక్ష్యంగా కృషిచేసే విద్యార్థులకి ఓ వరంగా మారిన సూపర్ 30 ప్రోగ్రామ్‌తో ఆనంద్ కుమార్ దేశవ్యాప్తంగా మంచి పేరు సంపాదించుకున్నారు. టీచర్ స్టోరీ కావడంతో బసంత్ పంచమి సందర్భంగా నిన్న సరస్వతి పూజతో ఈ సినిమా ప్రారంభమైంది. సూపర్ 30 జర్నీ మొదలైంది అంటూ హృతిక్ రోషన్ స్వయంగా ట్విటర్‌లో షేర్ చేసుకున్న వివరాలతోనే ఈ న్యూస్ బయటికొచ్చింది.
On the auspicious day of Saraswati Puja and Basant Panchami, I am beginning my journey of Super 30 where I am playing a teacher for the first time. May the Goddess of learning bless this effort.
— Hrithik Roshan (@iHrithik) January 22, 2018
రిలయన్స్ ఎంటర్‌టైన్‌మెంట్, ఫాంథమ్ ఫిలింస్ సంయుక్తంగా నిర్మిస్తున్న ఈ సినిమాలో హృతిక్ సరసన హీరోయిన్ ఎవరనే విషయంలో ఇంకా క్లారిటీ లేదు. కత్రినా కైఫ్‌ని హృతిక్‌కి జోడీగా తీసుకున్నట్టుగా గతంలో ప్రచారం జరిగినప్పటికీ ఆ విషయాన్ని ఎవ్వరూ అధికారికంగా ధృవీకరించలేదు. కుంకుం భాగ్య సీరియల్ నటి మృణాల్ థాకూర్‌ని హీరోయిన్‌గా తీసుకోవాలని భావిస్తున్నట్టుగానూ ఓ ప్రచారం జరుగుతోంది.
లైఫ్ ఆఫ్ పై సినిమా నిర్మాత డేవిడ్ వుమర్క్ తన తర్వాతి ఇండో-అమెరికన్ సినిమా లవ్ సోనియా కోసం మృణాల్ థాకూర్‌ని తీసుకున్న తర్వాత బాలీవుడ్‌లోనూ ఆమెకి మంచి డిమాండ్ ఏర్పడింది. పలువురు దర్శకులు, నిర్మాతల దృష్టిని ఆకర్షించిన మృణాల్ తాజాగా సూపర్ 30 డైరెక్టర్ వికాస్ బహల్ కంట్లోనూ పడినట్టు టాక్.
