అమెరికా మాజీ అధ్యక్షుడు మరియు దివంగత నేత జాన్ ఎఫ్ కెన్నెడీ హత్యకు సంబంధించిన రహస్య ఫైళ్ళను బహిర్గతం చేస్తామని యూఎస్ అధ్యక్షుడు డొనాల్డ్ ట్రంప్ ప్రకటించారు. నవంబరు 22, 1963 తేదీన కెన్నెడి డల్లాస్ ప్రాంతంలో దారుణంగా హత్య చేయబడ్డారు.
ఆ హత్యపై భిన్నాభిప్రాయాలు ఉన్నాయి. ఆ హత్యకు కారణం లీహార్వే ఆస్వాల్డ్ ఒక్కడేనా లేదా అతనికి తోడు ఇంకెవరైనా ఉన్నారా? అన్న విషయంపై అనేక వార్తాకథనాలు కూడా వెలువడ్డాయి. 1992లో వచ్చిన హాలీవుడ్ చిత్రం "జేఎఫ్‌కే" విడుదలైన తర్వాత ప్రజల అనుమానాలకు ఆ సినిమా మరింత తావిచ్చింది.
ఆ హత్య వెనుక పలు రాజకీయ ప్రయోజనాలు ఉన్నాయని ఆ చిత్రం వివరించింది. అయితే ఆ చిత్రం ద్వారా నిజాలు వెల్లడించామని చెప్పలేమని, కెన్నెడి హత్యకు కారణాలు ఏమై ఉంటాయి? అన్న కోణంలో ఆలోచించి ఎవరు హత్య చేసి ఉండవచ్చు అనే ఊహించి మాత్రమే సినిమా తీశామని ఆ సినిమా డైరెక్టరు ఓలివర్ స్టోన్ గతంలో తెలిపారు. అప్పటి నుండీ నిజనిజాలు తెలపాలని డిమాండ్లు వెల్లువెత్తాయి.
ఆ నిజనిజాలను తెలిపే డాక్యుమెంట్లు దాదాపు 3000 ఉంటాయని అంచనా. ప్రస్తుతం అమెరికాలోని "నేషనల్ ఆర్కైవ్స్ ఆఫ్ లా" ఆధ్వర్యంలో ఆ ఫైళ్ళు భద్రపరచబడి ఉన్నాయి. చక్ గ్రాస్లే లాంటి అమెరికా నాయకులు కూడా ఈ విషయంపై మాట్లాడారు. ఆ ఫైళ్ళను బహిర్గతం చేయాలని డిమాండ్ చేశారు.
