प्रथमच कपल म्हणून झळकणार सई ताम्हणकर- समीर चौघुलेची भन्नाट जोडी, 'गुलकंद'चा टीझर रिलीज
'व्हॅलेंटाईन डे'च्या निमित्ताने प्रेमाचा गोडवा वाढवण्यासाठी 'गुलकंद' मधून प्रथमच कपल म्हणून झळकणार सई ताम्हणकर- समीर चौघुलेची भन्नाट जोडी.
)
काही दिवसांपूर्वीच 'गुलकंद' चित्रपटाचे मोशन पोस्टर प्रदर्शित करण्यात आले होते. त्यानंतर प्रेक्षकांमध्ये या चित्रपटाबद्दल प्रचंड उत्सुकता निर्माण झाली होती. अशातच आता व्हॅलेंटाईन डेच्या निमित्ताने 'गुलकंद' चित्रपटाचा टीझर प्रदर्शित झालाय. ‘गुलकंद’ हा मुरलेल्या प्रेमाचा गोडवा चाखवणारा बहुप्रतिक्षित मराठी चित्रपट 1 मे रोजी प्रेक्षकांच्या भेटीला येणार आहे. प्रेक्षक आता या चित्रपटाची आतुरतेने वाट पाहात आहेत.
‘गुलकंद’च्या निमित्ताने सई ताम्हणकर आणि समीर चौघुले ही भन्नाट जोडी पहिल्यांदाच एकत्र आली असून प्रसाद ओक - ईशा डे यांचीही अफलातून जोडी पडद्यावर पाहायला मिळणार आहे.
'गुलकंद' चित्रपटाच्या टीझरमध्ये ढवळे आणि माने जोडप्यांच्या नात्याचा प्रवास रेखाटला आहे. सई ताम्हणकर - समीरमधील गोड संवाद आणि प्रेमळ नाते दिसत आहे. तर दुसरीकडे प्रसाद - ईशा यांच्यातील गंमतीशीर नोकझोक दिसत आहे. हलक्याफुलक्या, गंमतीशीर प्रसंगांसोबतच प्रेमाची झलक देखील यात पाहायला मिळतेय. संवादांची सहजता, पात्रांची केमिस्ट्री यामुळे प्रेक्षकांच्या मनात या फॅमकॉम चित्रपटाबद्दलची उत्सुकता प्रचंड वाढली आहे. चित्रपटाच्या टीझरमध्ये शेवटी प्रसाद ओक आणि सई ताम्हणकर यांच्या नजरेने मात्र प्रेक्षकांच्या मनात प्रश्नही निर्माण केले आहेत. त्यामुळे आता हा 'गुलकंद' किती मुरलेला आहे, हे 1 मे रोजी प्रेक्षकांना चित्रपटगृहात कळेल.
सचिन मोटे लिखित आणि सचिन गोस्वामी दिग्दर्शित या चित्रपटामध्ये सई ताम्हणकर, समीर चौघुले, ईशा डे, प्रसाद ओक, वनिता खरात, मंदार मांडवकर, जुई भागवत, तेजस राऊत, शार्विल आगटे यांसारख्या तगड्या कलाकारांचा समावेश आहे. सचिन गोस्वामी, सचिन मोटे आणि संजय छाब्रिया यांनी या चित्रपटाची निर्मिती केली आहे. बऱ्याच वर्षांनंतर मराठी चित्रपटसृष्टीत असा एक वेगळा चित्रपट येत आहे. प्रेक्षकांनी अनेक चित्रपटांमध्ये छोट्या भूमिका साकारताना समीर चौघुलेला पाहिले आहे. मात्र, पहिल्यांदाच ‘गुलकंद’ मध्ये समीर प्रमुख भूमिकेत दिसणार आहे. व्हॅलेंटाईन डेच्या निमित्ताने टीझर प्रेक्षकांच्या भेटीला आला आहे. या टीझरमध्ये दाखवलेली ढवळे आणि माने कुटुंबातील जिव्हाळा रसिकांच्या नक्कीच पसंतीस उतरेल असा विश्वास आहे. हा चित्रपट प्रत्येकाला हसवतानाच त्यांच्या आयुष्यातील प्रेमाची गोड आठवण देखील करून देईल.