చెస్టర్‌లీ స్ట్రీట్: ప్రపంచ కప్‌లో భాగంగా చెస్టర్‌లీ స్ట్రీట్‌లోని రివర్‌సైడ్ గ్రౌండ్ వేదికగా శుక్రవారం శ్రీలంకతో జరిగిన 35వ మ్యాచ్‌లో దక్షిణాఫ్రికా 9 వికెట్ల తేడాతో ఘన విజయం సాధించింది. తొలుత బ్యాటింగ్ చేసిన శ్రీలంక నిర్దేశించిన 204 పరుగుల విజయ లక్ష్యాన్ని 37.2 ఓవర్లలోనే కేవలం ఒక్క వికెట్ మాత్రమే కోల్పోయి ఛేదించింది. హషీం ఆమ్లా 105 బంతుల్లో 80 పరుగులు, డుప్లెసిస్‌ 103 బంతుల్లో 96 పరుగులు రాబట్టి సౌతాఫ్రికాకు ఘన విజయాన్ని అందించారు.
తొలుత బ్యాటింగ్ చేసిన శ్రీలంక సఫారీ బౌలర్లను ఎదుర్కోవడంలో ఘోర వైఫల్యం చెందింది. ఫలితంగా 49.3 ఓవర్లలో 203 పరుగులకే లంక ఆలౌటైంది. శ్రీలంక ఆటగాళ్లలో కుశాల్ పెరీరా, పెర్నాండోలు మినహా మరెవరూ కనీసం 30 పరుగులు కూడా చేయలేకపోవడం చూస్తే లంక బ్యాట్స్‌మెన్ సఫారీలను ఎదుర్కోవడానికి ఎన్ని తిప్పలు పడ్డారో ఇట్టే అర్థమవుతుంది.
ఇదిలావుంటే, ఈ మ్యాచ్‌లో ఘన విజయం సాధించిన సౌతాఫ్రికాకు ఫలితం లేకుండా పోయింది. ఆడిన 8 ఆటల్లో కేవలం రెండు విజయాలు మాత్రమే అందుకున్న కారణంగా సౌతాఫ్రికా వెనుకబడిపోయిన సంగతి తెలిసిందే.
