పశ్చిమ బెంగాల్ లోని సిలిగురి మునిసిపల్ కార్పొరేషన్ (ఎస్ఎంసీ) నగరంలో దోమల ప్రభావిత ప్రాంతాలను పరిశీలించడానికి డ్రోన్ల వాడకాన్ని ప్రవేశపెట్టింది. ఒక పాఠశాల విద్యార్థి ఆవిష్కరించిన డ్రోన్ సహాయంతో ఈ ప్రయోగానికి శ్రీకారం చుట్టింది.
'మేము ఒక నెలా రోజులపాటు ఈ డ్రోన్ ద్వారా నగరంలో దోమల ప్రభావిత ప్రాంతాలను గుర్తిస్తాము. ఇప్పటికే ఈ ప్రాజెక్ట్ గురించి అనేక రాష్ట్రాలు నన్ను అడిగాయి. డెంగ్యూను అరికట్టే చర్యల్లో ఇది ఉపయోగపడుతుందని భావిస్తున్నా. ఇది సక్సెస్ అయితే ఇతర రాష్ట్రాలతో ఈ విషయమై మాట్లాడుతాం" అని సిలిగురి మునిసిపల్ కార్పొరేషన్ మేయర్ అశోక్ భట్టాచార్జీ తెలిపారు.
ఈ డ్రోన్ ను ఆవిష్కరించిన విద్యార్థి రాజీవ్ ఘోష్ మాట్లాడుతూ- "గత ఏడాది, సిలిగురిలో డెంగ్యూ సమస్య ఉందని, ఎత్తైన భవనాల్లో డెంగ్యూ లార్వా ఉనికిని గుర్తించడం చాలా కష్టంగా ఉండేది" అని చెప్పారు. దోమల ప్రభావిత ప్రాంతాల ఏరియల్ ఫుటేజ్ లను సేకరించడానికి ఈ డ్రోన్ ఎంతగానో సహాయపడుతుందని అన్నారు.
2017 నాటి ఆరోగ్యశాఖ లెక్కల ప్రకారం, 1,287 మందికి డెంగ్యూ వ్యాధి సోకినట్లు, డెంగ్యూ వల్ల నలుగురు ప్రాణాలు కోల్పోయినట్లు నివేదించింది. డెంగ్యూ లక్షణాలతో సిలిగురి జిల్లా ఆసుపత్రి, నార్త్ బెంగాల్ వైద్య కళాశాల&ఆసుపత్రి (ఎన్బీఎంసీహెచ్)లో చాలామందిని అడ్మిట్ అయ్యారని నివేదిక వెల్లడించింది.
