மத்திய பிரதேசம், சிக்கிம் மற்றும் கேரளா ஆகிய மூன்று மாநிலங்களுக்கு பாஜக தலைவர்கள் இன்று நியமிக்கப்பட்டுள்ளனர்.
தமிழகம், கேரளா உள்ளிட்ட பல மாநிலங்களில் பாஜக மாநில தலைவர் பதவி நிரப்பப்படாமல் இருந்து வந்தது. சமீபத்தில் பாஜக தலைவராக தேர்ந்தெடுக்கப்பட்ட ஜெகத் பிரகாஷ் நட்டா, மத்திய பிரதேசம், சிக்கிம், கேரளா ஆகிய மாநிலங்களுக்கு பாஜக தலைவர்களை நியமித்துள்ளார்.
கேரள மாநில பாஜக தலைவராக சுரேந்திரனும், மத்திய பிரதேச மாநில பாஜக தலைவராக விஷ்ணு தத் சர்மா மற்றும் சிக்கிம் மாநில பாஜக தலைவராக தல் பகதூர் சவுகான் ஆகியோர் நியமிக்கப்பட்டுள்ளனர். இந்த அறிவிப்புகளை உடனடியாக நடைமுறைப்படுத்த பாஜக தலைமை உத்தரவிட்டுள்ளது.
தமிழக பாஜக தலைவராக இருந்த தமிழிசை செளந்தரராஜன் தெலங்கானா ஆளுநராக நியமிக்கப்பட்டுள்ளார். இதனால் கடந்த 5 மாதங்களாக தமிழக பாஜக தலைவர் நியமிக்கப்படவில்லை. இந்த ஆண்டு தலைவர் நியமிக்கப்பட்டால்தான் தமிழகத்தில் பாஜக காலூன்ற முயற்சிகள் மேற்கொள்ளப்படும். எனவே தமிழகத்திற்கு பாஜக தலைவர் விரைவில் நியமிக்கப்படலாம் என தகவல்கள் தெரிவிக்கின்றன.
